Lið KFS hefur spilað í 3.deild í sumar og sitja í 3.sæti A riðils með 20 stig. Hjalti Kristjánsson hefur verið þjálfari KFS frá sameiningu og í gærkvöldi skipti hann sjálfum sér inn á þegar markmaður KFS meiddist. Að mati Hjalta er stærsta vandamál fótboltans í eyjum er aðstöðuleysið og saknar hann þess að hafa ekki gervigras til að æfa á yfir vetrarmánuðina og fyrir þá leiki sem spilaðir eru á gervigrasi á fastalandinu. Hjalti hefur nóg að gera og eru næstu verkefni hjá honum verkefni U-21 landsliðsins í knattspyrnu við Kýpur, Hjalti hefur verið læknir U-21 liðsins frá árinu 1999.

Eyjar.net sendi Hjalta nokkrar spurningar varðandi sumarið og leikinn í gærkvöldi.

Nú spilaði KFS við KB í gærkvöldi og leikurinn endaði 2-4 og útlit er fyrir að KFS endi í 3-4 sæti í sínum riðlinum eftir mótið, bjóstu við betri stöðu í lok sumars? Já, átti von á 2. sæti og framan af móti vorum við örugglega nógu góðir til þess. Vörnin var betri en nokkru sinni fyrr með Sindra Viðars. sem aðalmann, en hann valdi að fara yfir til ÍBV fyrir 1. ágúst og það hefur haft sín áhrif. Ótrúleg hrina af mótlæti að undanförnu hefur hins vegar gert það að engu, þyrfti langan pistil til að fjalla um það ólán, sem elt hefur félagið.  Mikil forföll og getan minnkað, en við vonumst til að halda 3. sætinu með sigri í næsta leik og ná þá besta sæti okkar í 3 ár.

Undanfarin ár hefur KFS verið með venslasamning við ÍBV telurðu að það samkomulag hafi verið báðum liða til góða? Hiklaust.  Þeir spila nú með 3 leikmenn, sem við höfum alið upp fyrir þá undanfarin ár; Yngva Bor., Stefán Björn og Pétur Run.  Önnur og 3. deildin er mjög góður skóli fyrir slíka leikmenn. Við höfum líka notið góðs af þessum/slíkum leikmönnum, vorum með 3 í ár, fengum þá strax í apríl og gátum því byggt upp sterkan kjarna snemma, það var mikil framför í samskiptunum frá fyrri árum, þökk sé Heimi, sem hefur jú spilað með báðum félögum.

KFS hefur þurft að halda úti æfingum í eyjum og á höfuðborgarsvæðinu, hversu mikil áhrif er það að hafa á leik liðsins? Töluverð, nokkrum sinnum í sumar þurfti að kynna nýja leikmenn í klefanum fyrir leik, fyrir hinum hópnum! Segir sitt.  Aldrei hægt að taka uppstillingar almennilega fyrir leiki, því alltaf vantar lykilmenn úr hinum hópnum.  Hins vegar væri KFS búið að vera, ef ekki hefði komið til Reykjavíkurstarfsemin, sem batnar með hverju árinu.

Nú spilaðir þú í leiknum á móti KB í gærkvöldi og spilaðir það með peyjunum þínum Tryggva og Hjalta, hvað var til þess að þú skiptir sjálfum þér inná 48.ára gömlum? Skortur á mannskap, ég hélt í fyrra einu sinni enn, að mínum ferli væri lokið.  Í gær var ég 16. maður á skýrslu, markmaðurinn meiddist illa 8 mín. fyrir leikslok og því ekki um annað að ræða, ég er skárri en enginn, enn þá!

Fyrir þetta tímabil fór Yngvi Borgþórsson frá KFS yfir í ÍBV, hversu mikill munur er getulega á þessum liðum og heldurðu að í framtíðinni verði fleiri leikmenn sem komi frá KFS yfir í ÍBV? Með bæði lið í toppstandi er munurinn lítill, minni en flestir halda.  Við erum hins vegar mjög köflóttir, af því að mjög fáir halda sér við efnið allt sumarið. Á tímabili í vor taldi ég að við höfum verið síst lakari en ÍBV, en í dag myndu þeir rúlla yfir okkur. Munurinn á Yngva er hins vegar að hann er í mun betra standi en hjá okkur, það er auðvitað aðalmunurinn á liðunum almennt, að hjá mér mæta menn sjaldnar á æfingar, en eru alls ekki lélegri fótboltamenn margir hverjir, ég tel okkur eiga nokkra leikmenn í dag, sem væru nógu góðir fyrir ÍBV-hópinn, ef þeir gæfu því allan sinn frítíma. Já, ég held að þetta samstarf sé komið til að vera, ég tala nú ekki um, ef Heimir verður áfram, okkar samstarf er til fyrirmyndar og gagnkvæm virðing, sem er mikilvæg.