Sænskir fjölmiðlar fullyrtu í gær að íslenski landsliðsframherjinn Gunnar Heiðar Þorvaldsson væri undir smásjá Sigurðar Jónssonar þjálfara og félaga hjá sænska úrvalsdeildarliðinu Djurgården

Á fimmtudag lét aðstoðarþjálfari liðsins, Paul Lindholm, hafa eftir sér að Djurgården vantaði vissulega öflugan markaskorara, en hann vildi þó ekkert gefa upp um það hvort sá markaskorari væri Gunnar Heiðar.

Christian Hochstetter, stjórnarformaður Hannover, segist ekkert hafa heyrt frá forsvarsmönnum Djurgården. “Við höfum fundið fyrir áhuga frá Svíþjóð og við erum nú að íhuga framtíð hans [Gunnars Heiðars] hjá félaginu. En við höfum ekkert heyrt frá Djurgården,” sagði Hochstetter.

Gunnar Heiðar var ekki í leikmannahópi Hannover þegar liðið vann Karlsruhe í gærkvöld, en hann varð markakóngur í sænsku úrvalsdeildinni árið 2005, með sextán mörk, þegar hann lék þar með liði Halmdstad. Hann yrði því væntanlega góður liðsauki fyrir Djurgården í toppbaráttu sænsku deildarinnar.