Minkur fannst um borð í netabátnum Stíganda VE, sem liggur nú við landfestar í Vestmannaeyjahöfn. Minkur er ekki landlæg plága í Vestmannaeyjum og því er óvenjulegt að sjá slíkt kvikindi þar, hvað þá um borð í fiskibáti. Menn brugðust hins vegar skjótt við og líklega var ævintýraferð minksins til Vestmannaeyja sú síðasta sem dýrið fór.

Eftir rúmlega klukkustundar langt umsátur þeirra Adólfs Þórssonar og Ásmundar Pálssonar, meindýraeyðis Vestmannaeyjabæjar, skaust minkurinn undan netahrúgu og stökk út í sjó. Ásmundur náði tveimur skotum og virtist hæfa dýrið sem þó fannst ekki á eftir.