Enn einu sinni fæ ég þær fréttir að fyrirtæki í ferðaþjónustu hér í Vestmannaeyjum sé komið á sölu. Er það bara ég sem er undrandi og óánægð, eða er verið að draga heilt samfélag á asnaeyrunum viku eftir viku, mánuð eftir mánuð og ár eftir ár? Hver mun greiða skaðann sem hlýst af röngum ákvörðunum sem teknar eru af stjórnvöldum? Fyrirtæki í ferðaþjónustu í Eyjum eru gjörsamlega búin að fá nóg.
Eyjamönnum var lofað samgöngubót fyrir nokkrum árum, höfn og nýju skipi. Það ríkti mikil bjartsýni. Margir einstaklingar fjárfestu í ferðaiðnaði, fjölskyldur hafa lagt fjármagn, metnað og mikla vinnu í að koma á fót rekstri og reynt af veikum mætti að halda velli í óstöðugasta umhverfi ferðamennskunnar sem til er á Íslandi. Það er virkilega sláandi og í raun bara grátlegt að fara yfir þann lista af fyrirtækjum hér í Eyjum sem fjárfestu í ferðaþjónustu. Það þarf ekki að fara nema örfá ár aftur í tímann til þess að geta talið upp a.m.k. 17 fyrirtæki sem hafa þurft að loka eða hafa skipt um rekstaraðila, sum tvisvar og jafnvel þrisvar, þá tel ég ekki með verslanir sem að sjálfsögðu finna fyrir þessu líka. Vonir okkar hafa því miður strandað í Landeyjahöfn. Ferðabólan kannski sprungin og farin framhjá og við ennþá ekki einu sinni komin úr startblokkinni.
Nú níu árum eftir að Landeyjahöfn opnaði er ekkert tiltökumál að höfnin sé lokuð fram í maí, full af sandi. Vegagerðin tekur lægsta tilboði í dýpkun hafnarinnar, frá fyrirtæki sem allir vissu að réði ekki við verkið! Það er von að tilboðið hafi verið lágt, en það er alls ekki hagkvæmt. Heilt samfélag er sett á bið og fyrirtæki og einstaklingar í gjaldþrot. Er það í lagi?
Nýja skipið okkar, sem loksins er tilbúið, er í gíslingu í Póllandi. Það eru einhverjar viðræður í gangi sem enginn veit hvernig ganga, kannski skiptir það hvort sem er engu máli!
Ég ræddi í dag við nokkra aðila sem reka ferðaþjónustufyritæki hér í Eyjum og það er ljóst að skaðinn veltur á tugum milljóna bara í apríl. Gisting er afbókuð á hverjum degi, borðapantanir á veitingastöðum afpantaðar á hverjum degi, afbókun á einum hópi í mat og gistingu, ein milljón, gestir sem ætluðu í prívat ferðir um síðustu helgi, tvær milljónir. Veitingastaðir og söfn verða af tekjum upp á hundruð þúsunda á hverjum degi. Samfélaginu blæðir.
Við sem enn stöndum eftir, hvernig við nennum að standa í þessu og berjast, er mér hulin ráðgáta. Stjórnvöld þurfa að taka sig á er varðar landsbyggðina. Hætta að afgreiða okkur eins og eitthvað pakk sem skiptir ekki máli. Ef ekki er eins gott að slökkva bara ljósin allsstaðar nema í Reykjavík og lifa við það. Margfalda peninga bara í bankanum, draga fiskinn að landi inní Hörpuna og setja kýrnar á beit á Laugardalsvelli. Það passar reyndar bara vel inní þetta ruglaða ævintýri sem þetta er orðið.
Bergþóra Þorkelsdóttir vegamálastjóri, hvert er planið?
Berglind Sigmarsdóttir, formaður Ferðamálasamtaka Vestmannaeyja
