Gary Martin skoraði sitt tólfta mark í sumar þegar hann jafnaði úr vítaspyrnu á móti Breiðablik í síðustu umferð. Gary er næstmarkahæstur fyrir lokaumferðina í Pepsi Max deildinni en aðeins Hilmar Árni Halldórsson leikmaður Stjörnunnar hefur skorað meira, en Hilmar er kominn með þrettán mörk í sumar. ÍBV heimsækir einmitt Stjörnuna í lokaumferð deildarinnar þannig að ansi líklegt má teljast að úrslitin um gullskóinn eftirsótta ráðist á Samsung vellinum klukkan 14:00 í dag. Það nægir Gary að jafna Hilmar Árna að markafjölda því Hilmar hefur leikið 21 leik í deild en Gary aðeins 14. Takist Gary Martin að hreppa hnossið þá er það í fyrsta skipti sem leikmaður fær gullskóinn og fellur um deild.
Fjórir leikmenn hafa afrekað það að næla sér í bronsskó og vera í liði sem fellur um deild. Það gerði Kjartan Einarsson þegar hann féll með Keflavík árið 1989 og Bjarni Sveinbjörnsson skoraði 11 mörk fyrir Þór Akureyri árið 1994 sem dugði einnig fyrir bronsskó. Þróttarinn Björgólfur Takefusa náði í bronsskó árið 2003 með því að skora 10 mörk, en sama ár skoraði liðsfélagi hans Sören Hermannsen 14 mörk og uppskar silfurskó. Þrátt fyrir að eiga tvo af þrem markahæstu leikmönnum tímabilsins það ár féllu Þróttarar úr deild þeirra bestu. Aðeins einn annar hefur fallið með silfurskó en það var okkar maður Tómas Ingi Tómasson sem skoraði 14 mörk einnig fyrir Þrótt Reykjavík árið 1998.
Sá síðasti til að næla í gullskóinn fyrir ÍBV var Gunnar Heiðar Þorvaldsson árið 2003 og var það annar gullskór Gunnars á jafnmörgum árum. Tryggvi Guðmundsson var fyrsti leikmaður ÍBV til að hreppa gullskó árið 1997. Steingrímur Jóhannesson gerði það svo næstu tvö árin þar á eftir. Jonathan Glenn fékk silfurskó 2014 og 2015 en hann skipti í Breiðablik á miðju seinna tímabilinu.
Fari svo að Gary Martin næli í skóinn eftirsótta á laugardag verður það sjötti gullskór ÍBV sem verður þar með jafnt ÍA á lista yfir flesta gullskó félagsliða.
Eins og áður segir hefst leikur Stjörnuna og ÍBV á Samsung vellinum í Garðabæ klukkan 14:00 í dag.
