„Ég hef ekki fengið neinar nánari upplýsingar um þetta undarlega mál og engar nánari skýringar þrátt fyrir að ég hafi vakið máls á þessu,“ segir Helgi Bernódusson, fyrrverandi skrifstofustjóri Alþingis og „gamall Eyjamaður“, eins og hann titlar sjálfan sig undir grein sem hann skrifaði í Morgunblaðið 19. mars. Viðtalið er að finna í Morgunblaði dagsins.
Þar spurði Helgi einfaldlega spurningarinnar „Hvað varð um ungverska flóttamanninn Imre Bácsi?“ og rakti sögu Bácsi þessa sem kom til Íslands í hópi rúmlega fimmtíu flóttamanna í kjölfar mótmæla háskólastúdenta í Ungverjalandi í október 1956, sem lyktaði með blóðugri uppreisn.
Var Bácsi í hópi tíu landa sinna sem fóru til starfa í Vestmannaeyjum en þar hvarf hann sporlaust árið 1963, þá 26 ára gamall, eftir að hafa unnið í Vinnslustöðinni í sjö ár. Margir hafa þó sett sig í samband við Helga eftir að grein hans birtist þótt ekki hafi verið feitan gölt að flá hvað upplýsingar um örlög Ungverjans varðar.
„Það eru auðvitað margir sem muna eftir honum og kannast við hann,“ segir Helgi sem fyrir nokkru skrifaði grein um flóttamannahópinn í jólablaði Fylkis.
Sjá nánar í Morgunblaðinu.
