Mikill hugur í Hallarfólki – Flottasta jólahlaðborðið

„Lundaballið var glæsilegt hjá Elliðaeyingum og svo héldu bæði Vinnslustöðin og Ísfélagið sínar árshátíðir hjá okkur. Ekki má gleyma afmæli Geisla sem var mjög gaman að hýsa. Við eigum allt okkar undir því að húsið sé notað og reynum að þjónusta alla með besta móti. Þá hafa aðrir viðburðir, sem eru þó nokkrir, gengið afar vel,“ segir Daníel Geir Moritz sem rekur Höllina ásamt Svani Gunnsteinssyni og fjölskyldum.

Um síðustu helgi var handverks- og vörumarkaður sem gekk mjög vel. „Við erum mjög ánægð með þátttökuna, yfir 20 aðilar tóku þátt og aðsókn var góð. Við vorum með kaffihús með kakói og tilheyrandi meðfram markaðnum til koma fólki í jólagírinn.“

Þann 25. nóvember verða rokktónleikar þar sem rokksena Eyjanna, Rokkeldið, ætlar að sýna flóruna á tvennum tónleikum. Fyrst á opnum fjölskyldutónleikum og síðan með því að hækka enn meira í græjunum um kvöldið. Það er geggjað að fá svona í húsið.

„Hápunktur aðventunnar hjá okkur verður jólahlaðborðið 8. og 9. desember. Við gerum það í samstarfi við Einsa kalda. Þegar fólk verður að klára sig af kræsingum hefst tónlistarveisla. Á henni verður Ragga Gísla sérstakur gestur en ásamt henni syngja Einar Ágúst, Þórarinn Óla, Sæþór Vídó og hinar frábæru Una og Sara. Það er mitt mat að þetta sé flottasta jólahlaðborð landsins, enda sameinum við matinn hjá Einsa við geggjaða tónleika fyrir verð sem fólk borgar annars staðar fyrir annað hvort. En þetta getum við gert vegna frábærar aðsóknar sem við veðjum á,“ segir Daníel Geir og er ánægður með stöðuna.

„Margir viðburðahaldarar berjast í bökkum en við getum ekki kvartað yfir mætingu, þvert á móti. Fólk er duglegt að koma og er bjart framundan. Árið í ár er orðið miklu stærra en í fyrra og 2024 lítur strax vel út.“

 

Myndir: Hallarbræður, Daníel Geir og Svanur í góðum gír.

Stórhátíð Krabbavarnar var einn af stórum viðburðum í Höllinni i haust.

 

Nýjustu fréttir

Fréttatilkynning
Herrakvöld fótboltans
Beint
Fundur bæjarstjórnar í beinni
Aðsend grein
Samgöngur og sannindi
Samgöngur
Staðan í Landeyjahöfn
Aðsend grein
Vestmannaeyjahöfn, lífæð samfélagsins
Stjórnmál
Sæunn Magnúsdóttir er tilbúin í slaginn
Íþróttir
ÍBV í úrslit eftir sigur gegn Haukum
Samgöngur
Erfið staða í Land­eyja­höfn
Mest lesið

Góð ráð fyrir siglingu

Sjóveiki

Hvað er sjóveiki?

Sjóveiki er misræmi milli skynfæra líkamans sem senda boð til heilans um hreyfingu – kyrrstöðu.

Þegar einstaklingur er úti á sjó þá nema skynjarar í vökvafylltum gangi í innra eyra hreyfingu og senda boð til heilans að einstaklingur sé á hreyfingu. Augun senda hins vegar boð til heilans um að viðkomandi sé kyrr. Heilinn á erfitt með að vinna úr þessum misvísandi og ósamræmdu upplýsingum og sendir skilaboð til magans um að tæma sig – þ.e. veldur uppköstum.

Einkenni sjóveiki eru þreyta, ógleði, svimi, svitakóf og uppköst.

Góð ráð til að hindra sjóveiki:

  • Góð hvíld daginn fyrir brottför. Að fara seint að sofa og snemma um borð í bát fer ekki vel saman ef fólk er hætt við sjóveiki.
  • Forðist áfenga drykki daginn fyrir brottför
  • Forðist djúpsteiktan, brasaðan eða saltan mat daginn fyrir siglingu.
  • Borðið góðan morgunverð. Borðið gjarnan hvítt brauð, hafragraut og ávexti þó ekki sítrus ávexti.
  • Forðist mikið koffein. Mikið kaffi er ekki það sem maganum líkar fyrir sjóferð.
  • Hafðu mat með þér á sjó. Gott er að hafa samlokur með kjúklingi eða kalkún. Kjötið er fitusnautt og brauðið er róandi í maga. Hafðu endilega eitthvað til að grípa í sem er létt í maga. Bananar eru mjög góðir til að narta í ef þú finnur fyrir ógleði en einnig er gott að hafa létt kex eða annað sem er ekki salt eða fitumikið.
  • Drekkið vel af vatni en einnig er gott er að drekka kóla drykki eða engiferöl í sjóferðinni

Lyf við sjóveiki þ.e. lyf sem slá á einkennin og fást án lyfseðils í apóteki.

  • Koffínátín – fæst án lyfseðils
  • Postafen – fæst án lyfseðils
  • Scopolamin plástur – lyfseðilsskyltEinnig má fá armbönd gegn ferðaveiki sem sumir telja að hjálpi.

Önnur ráð:

  • Engifer er jurt sem nýlega hefur fengið aukna athygli vegna þess að því er haldið fram að hún geti slegið á ógleði sem fylgir sjóveiki. Til forna tuggðu kínverskir sjómenn engiferrót til að draga úr sjóveiki. Flest lyf sem virka á ógleði verka á heilann en engifer virkar aðeins á magann. Ráðlagt er að taka 1000 mg. hylki hálftíma fyrir brottför. Einnig má taka eitt eða tvö 500 mg. hylki sem eru til viðbótar á ferðalaginu. Ekki er ráðlagt að drekka coke með engifertöflum.
  • Piparminta og te eru einnig gömul húsráð við ferðaveiki.
  • Sumum finnst betra að taka sýrujafnandi töflur, Alminox eða slíkt áður en þú heldur á sjó og þá er gott að hafa box með út á sjó.

Hvar í skipinu er best að vera o.fl.

  • Minna finnst fyrir hreyfingu og veltingi ef maður er staddur næst miðju bátsins.
  • Mörgum finnst gott að vera í kulda, t.d.að vera úti á dekki og láta vindinn leika um sig.
  • Matarlykt fer illa í þá sem hætt er við sjóveiki og einnig pústið frá bátnum.

Þungun:

Þungaðar konur sem þjást af sjóveiki mega nota koffinátín í litlum skömmtum en best er að ráðfæra sig við lækni eða lyfjafræðing.
Þunguðum konum er ekki ráðlagt að nota engifer þar sem það er ekki staðfest hvort það geti haft skaðleg áhrif á fóstur.

Eyjafréttir
Keyrt af  GDPR Cookie Compliance
Friðhelgisyfirlýsing

Þessi vefsíða notar fótspor til að við getum veitt þér bestu notendaupplifun. Upplýsingar um fótspor eru geymdar í vafranum þínum og framkvæma aðgerðir eins og að þekkja þig þegar þú kemur aftur á vefsíðu okkar og hjálpa teymi okkar að skilja hvaða hluta vefsíðunnar þér finnst áhugaverðast og gagnlegast.