Framhaldsskólinn í Vestmannaeyjum hlaut í gær viðurkenningu í könnun Sameykis um stofnun ársins 2023. FÍV er fyrirmyndarstofnun og er í fyrsta sæti  í flokki minni stofnanna.

Framhaldsskólinn í Vestmannaeyjum hefur síðastliðinn áratug verið með þeim efstu í þessari könnun og þetta er í þriðja sinn sem skólinn fær viðurkenninguna „Stofnun ársins“. Við í FÍV erum virkilega stolt yfir þessari niðurstöðu.

Thelma B. Gísladóttir aðstoðarskólameistari og Elísabeth Ruth Guðmundsdóttir forstöðumaður bókasafns FÍV veittu viðurkenningunni viðtöku við hátíðlega athöfn hjá Sameyki.

Titlana Stofnun ársins, hljóta þær stofnanir sem þykja skara fram úr í þeim níu þáttum sem könnun Sameykis byggir á að mati starfsmanna þeirra. Um er að ræða mat á innra starfsumhverfi stofnana og starfsstaða.

Stofnun ársins er samstarfsverkefni Sameykis, fjármála- og efnahagsráðuneytisins og Reykjavíkurborgar. Könnunin veitir mikilvægar upplýsingar um styrkleika og áskoranir í starfsumhverfi stofnana, starfsfólki til hagsbóta.

Á hverju ári tekur allt starfsfólk skólans, óháð félagsaðild, þátt í könnuninni sem fer þannig fram að spurningalisti er lagður fyrir starfsfólk á netinu. Mælingin nær yfir níu ólíka þætti og þannig fæst heilsteypt mynd af innra starfsumhverfi stofnana. Þeir níu þættir sem eru mældir eru: stjórnun, starfsandi, launakjör, vinnuskilyrði, sveigjanleiki vinnu, sjálfstæði í starfi, ímynd stofnunar, ánægja og stolt og jafnrétti.

Þess má geta að þetta er ekki í fyrsta sinn sem FÍV er valin Stofnun ársins, líkt og fréttirnar hér að neðan staðfesta. Til hamingju allir í FÍV.

https://eyjar.net/fiv-valin-stofnun-arsins/

https://eyjar.net/2020-10-14-framhaldsskolinn-i-vestmannaeyjum-hlytur-nafnbotina-stofnun-arsins/

https://eyjar.net/2018-05-09-framhaldsskolinn-i-vestmannaeyjum-stofnun-arsins/

https://eyjar.net/2015-05-09-framhaldsskolinn-i-eyjum-hastokkvari-arsins/