Komin er út skýrsla þar sem gerð er grein fyrir framkvæmd og helstu niðurstöðum stofnmælingar botnfiska á Íslandsmiðum sem fram fór dagana 27. febrúar til 23. mars 2025. Í tilkynningu frá Hafrannsóknastofnun segir að niðurstöður séu bornar saman við fyrri ár en verkefnið hefur verið framkvæmt með sambærilegum hætti ár hvert frá 1985.

Stofnmæling botnfiska á Íslandsmiðum (einnig nefnd marsrall, togararall eða SMB) fór fram í 41. sinn. Rannsóknaskipin Árni Friðriksson og Þórunn Þórðardóttir og
togararnir Breki VE og Þórunn Sveinsdóttir VE, og alls um 100 starfsmenn, tóku þátt í verkefninu. Var þetta fyrsti leiðangur nýs rannsóknaskips, Þórunnar Þórðardóttur, og einnig í fyrsta sinn sem togarinn Þórunn Sveinsdóttir tók þátt í þessu verkefni, að því er segir í skýrslunni.

Þorskur

Stofnvísitala þorsks hækkaði nær samfellt árin 2007-2017, fyrst og fremst vegna aukins magns af stórum þorski. Eftir hámarkið 2017 hefur vísitalan lækkað og er hún aðeins lægri í ár en í fyrra. Fjöldavísitala þorsks 25-45 cm var undir meðaltali en líkt og undanfarin ár var vísitala stærsta þorsks (>70 cm) yfir meðaltali rannsóknatímans.

Magafylli þorsks var nálægt meðaltali og loðna var rúmlega helmingur af fæðu þorsks af öllum stærðarflokkum. Loðna fannst helst í fæðu þorsks út af Vestfjörðum og Húnaflóa.

Ýsa

Stofnvísitala ýsu hefur hækkað frá árinu 2016 eftir að vera lág á árunum 2010-2016. Þó vísitala ýsu hafi lækkað frá því í fyrra þá hefur vísitalan 2023-2025 verið há, eða svipuð og á árunum 2003-2007 þegar hún var sú hæsta á rannsóknatímabilinu.

Meira var af loðnu í mögum millistórrar ýsu en minna í mögum stærstu ýsunnar samanborið við fyrri ár. Loðna fannst helst í mögum út af Vestfjörðum.

Aðrar tegundir

Stofnvísitala ufsa hækkaði en litlar breytingar voru á vísitölum steinbíts, skarkola og gullkarfa. Þó var vísitala 10-15 cm gullkarfa yfir meðallagi. Vísitölur keilu og löngu voru þær hæstu frá upphafi mælinga og einnig hefur vísitala skötusels hækkað á síðustu árum.

Hitastig sjávar

Hitastig sjávar við botn mældist að meðaltali hátt líkt og undanfarna tvo áratugi, segir að endingu í tilkynningunni.

Skýrsluna má finna hér.