Á fundi framkvæmda- og hafnarráðs Vestmannaeyja í gær var tekið fyrir erindi frá framkvæmdastjóra Herjólfs fyrir hönd stjórnar Herjólfs ohf. þar sem farið er fram á að Herjólfur njóti forgangs í siglingum um Vestmannaeyjahöfn.

Fram kemur í bréfinu að það sé hagur bæjarbúa og annarra farþega að hægt sé að treysta því að skipið haldi áætlun og komu- og brottfarartímar standist. Áhöfn og starfsfólk Herjólfs ohf. eru meðvituð um þá ábyrgð og leggja sig í hvívetna fram um að halda áætlun – og gengur það að mestu leyti vel.

Það sem hefur þó ítrekað tafið ferðir Herjólfs, eru aðstæður í Vestmannaeyjahöfn; þegar verið er að taka inn skip eða fara með þau út nákvæmlega á þeim tíma sem Herjólfur er að sigla inn eða út úr höfninni.  Þetta eru óþarfa tafir sem brýnt er að koma í lag sem allra fyrst.

Í niðurlagi erindisins er farið fram á að sú regla verði tekin upp að Herjólfur njóti forgangs í siglingum um Vestmannaeyjahöfn sem þýðir að skip sem þurfa þjónustu hafnsögumanna verði ekki í siglingum innan hafnar á þeim tíma þegar gert er ráð fyrir að Herjólfur sigli inn eða út samkvæmt áætlun skipsins.

Vísuðu erindinu frá

Ráðið vísaði erindi stjórnar Herjólfs frá og bendir á 4. gr hafnarreglugerðar Vestmannaeyjahafnar þar sem hafnarstjóri fer með daglega stjórn hafnarinnar og sér um að gætt sé regla á öllu hafnarsvæðinu. Hins vegar ítrekar ráðið mikilvægi þess að Herjólfur verði fyrir eins litlum töfum og hægt er.

Geti ekki talist góð og eðlileg stjórnsýsla

Sæunn Magnúsdóttir annar fulltrúi Sjálfstæðisflokksins vék af fundi við afgreiðslu málsins, en hún situr einnig í stjórn Herjólfs. Í bókun frá Hannesi Kristni Sigurðssyni hinum fulltrúa Sjálfstæðisflokksins í ráðinu segir að hann telji meðferð málsins á fyrstu stigum ábótavant enda svaraði hafnarstjóri erindinu með bréfi dagsettu 27. júní sl. án þess að það kæmi fyrir framkvæmda- og hafnarráð, þrátt fyrir að erindinu hefði verið beint til ráðsins, og þurftu bæði varaformaður framkæmda- og hafnarráðs og framkvæmdastjóri Herjólfs að ganga á eftir því að erindið fengi að fara fyrir ráðið. Slík vinnubrögð geta ekki talist góð og eðlileg stjórnsýsla. Hvað varðar erindi stjórnar Herjólfs ohf. um að Herjólfur njóti forgangs í Vestmannaeyjahöfn þá telur fulltrúi D lista það eiga að vera auðsótt mál að veita eina aðilanum er sinnir almenningssamgöngum til og frá Vestmannaeyjum forgang í höfninni á fyrirfram ákveðnum tímum, þ.e. siglingaáætlun skipsins, enda slíkt alþekkt t.d. á alþjóðaflugvöllum þar sem flugfélög með fasta áætlun njóta forgangs á fyrirfram ákveðnum tímum.

Ekki óeðlilegt að hafnarstjóri svari erindinu

Í bókun Arnars Richardssonar, Helgu Jóhönnu Harðardóttur og Erlings Guðbjörnssonar fulltrúa E og H lista segir að það sé ekki óeðlilegt að hafnarstjóri svari erindi er varða daglegan rekstur og störf hafnarinnar og upplýsi ráðið. Við vísum í fyrri bókun og erum öll sammála um að Herjólfur verði fyrir sem minnstum töfum.

Tefjist eigi meira en um 7 mínútur að hámarki tvisvar í viku yfir sumarið

Í svari Dóru Bjarkar Gunnarsdóttur, hafnarstjóra til Herjólfs ohf. segir m.a. að eftir að hafa farið yfir málið sé henni ekki kleift að veita Herjólfi forgang í höfninni. Hún bendir á að erfitt sé að samræma aðra skipaumferð í kringum ferðir ferjunnar. Hún segist hafa farið þess á leit við hafnsögumenn um að þeir taki tillit til ferða ferjunnar þannig að áætlun hennar tefjist eigi meira en um 7 mínútur að hámarki tvisvar í viku yfir sumarmánuðina og að hámarki einu sinni í mánuði yfir vetrarmánuðina.

Enn fremur segir að stefnt sé á að bakka inn 14 skemmtiferðaskipum það sem eftir er sumars og tekur það allt að 50 mínútur frá klettsnefi. Í niðurlagi bréfs hafnarstjórans segir að áfram muni verða leitast við að samræma umferð eins vel og kostur sé.

Vel þekkt að almenningssamgöngur njóti forgangs á aðra umferð

Ólafur Jóhann Borgþórsson, framkvæmdastjóri Herjólfs ohf. segir í samtali við Eyjafréttir að það sé oft mikill traffík innan hafnar. „Ég tala nú ekki um með fjölgun skemmtiferðaskipanna, sem er hið besta mál og gaman að fá allan þennan fjölda gesta í bæinn. En það tekur oft langan tíma að koma þessum skipum að bryggju sem hefur orðið til þess að Herjólfi seinkar um allt að fimmtán mínútur, sem er ekki gott bæði vegna þess að við erum í mjög stífri áæltun sérstaklega í júlí og þá munar okkur um hverja mínútu til þess að geta haldið áætlun. Þess vegna fórum við fram á að Herjólfur fái forgang, en það er svo sem vel þekkt hér á landi og annars staðar að almenningssamgöngur njóta forgangs á aðra umferð, eins og til dæmis strætóakreinar í Reykjavík eru til vitnis um. Þess vegna finnst mér miður að það skuli ekki vera hægt að gera slíkt hér í Eyjum, þannig að farþegar geti treyst á áætlun Herjólfs,” sagði Ólafur Jóhann sem bætir við að hann viti að allir sem að málinu komi vilji að þessir hlutir gangi sem best fyrir sig og segir að von sé á nýju bréfi um hugmyndir að breyttu verklagi.