Bæjarmálafélagið Fyrir Heimaey mun ekki bjóða fram lista í bæjarstjórnarkosningunum í Vestmannaeyjum í vor. Ákvörðunin var tekin á fundi félagsins í dag.

Í tilkynningu segir að félagið sé ekki stjórnmálaflokkur og því sé þátttaka í kosningum ekki sjálfgefin. „Nú látum við gott heita,“ segir jafnframt í yfirlýsingunni.

Fyrir Heimaey, H-listinn, hefur haft forystu í bæjarstjórn Vestmannaeyja í tvö kjörtímabil, alls átta ár. Í tilkynningunni kemur fram að félagið sé afar stolt af þeim árangri sem náðst hafi í rekstri og stjórn bæjarfélagsins á tímabilinu, sem og þeim áherslum sem beitt hafi verið í þágu samfélagsins.

Ákvörðunin kemur í kjölfar þess að allir bæjarfulltrúar félagsins hafa tilkynnt að þeir hyggist ekki gefa kost á sér áfram. Það eru Íris Róbertsdóttir, bæjarstjóri, Páll Magnússon, forseti bæjarstjórnar, og Jóna Sigríður Guðmundsdóttir, sem öll greindu frá ákvörðun sinni í morgun.

Í lok tilkynningar þakkar Fyrir Heimaey öllum þeim sem stutt hafa félagið og starfað á þess vegum að bæjarmálum síðustu átta ár og segir framlag þeirra hafa verið mikilvægt til að gera bæinn betri.

Með þessari ákvörðun liggur fyrir að enginn fulltrúi núverandi meirihluta í bæjarstjórn mun gefa kost á sér áfram í komandi kosningum. Áður höfðu bæjarfulltrúar E-listans einnig tilkynnt að þau hygðust stíga til hliðar, þau Njáll Ragnarsson, formaður bæjarráðs, og Helga Jóhanna Harðardóttir, bæjarfulltrúi.