Aníta Jóhannsdóttir hefur tilkynnt á samfélagsmiðlum að hún hyggist gefa kost á sér í 2. sæti í komandi prófkjöri Sjálfstæðisflokksins í Vestmannaeyjum.

Í tilkynningu sinni segist Aníta, sem er fædd og uppalin í Eyjum, vilja leggja sitt af mörkum til áframhaldandi uppbyggingar samfélagsins. „Sem fædd og uppalin Eyjakona vil ég leggja mitt af mörkum til áframhaldandi uppbyggingar samfélagsins okkar,“ segir hún.

Aníta hefur tíu ára reynslu í fjármálum og rekstri hjá sjávarútvegsfyrirtækjum og segir þá reynslu nýtast vel í störfum fyrir bæjarfélagið. Hún þekki því vel bæði styrkleika og tækifæri atvinnulífsins í Eyjum.

Á yfirstandandi kjörtímabili hefur hún gegnt stöðu formanns fræðsluráðs Vestmannaeyja og jafnframt verið varabæjarfulltrúi. Hún segir þá reynslu hafa kennt sér hvað skipti mestu máli í sveitarstjórnarmálum.

„Sterk hagsmunabarátta, framsýn menntastefna og öflug samvinna eru lykilatriði í farsælu samfélagi,“ segir Aníta og bætir við að hún sé tilbúin að leggja sig alla fram fyrir framsækið og fjölskylduvænt samfélag.

Hún óskar eftir stuðningi í 2. sætið í prófkjörinu sem fram fer föstudaginn 13. mars.