Knattspyrnumaðurinn Elvis Bwonomo hefur skrifað undir samning við ÍBV út keppnistímabilið en hann er að koma til liðsins í annað skiptið. Fyrst kom Elvis til liðsins árið 2022 og lék þá með ÍBV tvö leiktímabil en hann var eftir tímabilið 2023 valinn besti leikmaður ÍBV.

Í tilkynningu frá félaginu segir að hann sé fyrst og fremst öflugur varnarmaður en hann getur leyst flestar stöðurnar í öftustu línu með prýði. Elvis verður 27 ára seinna á árinu en hann var á mála hjá skoska liðinu St. Mirren en hefur verið samningslaus frá því að samningur hans rann út 30. júní.

Elvis kemur frá Úganda eins og margir öflugir leikmenn sem spilað hafa fyrir ÍBV en hann á að baki tvo landsleiki fyrir þjóðina. Hann hefur samtals leikið 48 leiki fyrir ÍBV og er ljóst að nú verða þeir fleiri. Knattspyrnuráð ÍBV fagnar komu Elvis og býður hann velkominn til Vestmannaeyja á nýjan leik, segir í tilkynningunni.