Arnar Hjaltalín, formaður Drífanda – stéttarfélags gagnrýnir miðstjórn ASÍ fyrir að nýta uppsagnir í fiskvinnslu í pólitískum tilgangi. „Það heyrðist ekkert frá ASÍ fyrr en þessi ályktun kemur, og það er aðeins verið að reyna hvítþvo ríkisstjórnina með ályktuninni. Við fréttum bara af henni af afspurn en enginn hefur haft samband við okkur frá ASÍ, hvorki tölvupóstur né símtal,“ segir hann.

Í nýlegri ályktun ASÍ var fjallað um stöðuna í sjávarútvegi, en Arnar segir augljóst að þar hafi m.a. verið vísað til uppsagnanna í Eyjum.

Stór biti fyrir lítið samfélag

Um 50 manns misstu vinnuna í uppsögnunum, þar af voru 40% yfir fimmtugt og fimm yfir 67 ára aldri. „Þetta eru 3,5% af félagsmönnum Drífanda en mun hærra hlutfall af félagsgjaldatekjum. Það sýnir að fólkið var að lyfta sér langt yfir meðallaun með mikilli vinnu,“ segir Arnar.

Þrátt fyrir að hluti fólks hafi fengið störf í öðrum deildum fyrirtækisins eða horft til annarra tækifæra, telur hann ljóst að 50 störf séu horfin fyrir fullt og allt. „Þetta er mikið högg fyrir vinnumarkaðinn og samfélagið hér,“ bætir hann við.

Ójöfnuður í aðgangi að auðlindum

Í ályktun ASÍ var bent á að sjávarauðlindir væru sameign þjóðarinnar. Arnar tekur undir það, en segir að sami hugsunarháttur gildi ekki um aðrar auðlindir. „Við á landsbyggðinni greiðum margfalt meira fyrir rafmagn, heitt vatn og jafnvel drykkjarvatn en fólk á suðvesturhorninu. Þar heyrist ekkert frá miðstjórn ASÍ, enda njóta margir þeirra þessara auðlinda sjálfir án þess að við fáum hlutdeild í þeim með sama lága verðinu og afhendingaröryggi eins og fólk á suðvesturhorninu nýtur.

Þakkar Höllu fyrir stuðning

Arnar segir aðspurður að einungis Halla Gunnarsdóttir, formaður VR, hafi boðið fram aðstoð og heimsótt félagið. „Hún á heiður skilið fyrir það,“ segir hann.

Formaðurinn leggur áherslu á að uppsagnirnar eigi ekki að nota til að styrkja pólitíska baráttu eða búa til sundrung milli hópa. „Útgerðin er hvorki vinur okkar né óvinur. Stærstu ógnirnar við samfélagið liggja í kaupum á útgerðum úr byggðarlaginu, óréttmætri skiptingu auðlinda og sértækri skattpíningu á landsbyggðina,“ segir hann.

Einn þingmaður haft samband

Spurður um viðbrögð þingmanna segir Arnar að Víðir Reynisson sé eini þingmaðurinn sem hafi sýnt málefnum Eyjanna og þessum uppsögnum einhvern áhuga.

„Við áttum gott samtal með honum og var farið yfir víðan völl. Ekki bara uppsagnirnar og málefni tengd þeim. Farið var yfir kostnað fólks á landsbyggðinni vegna heilbrigðisþjónustu og hvað hallar á okkur miðað við þá sem „þurfa bara að hlaupa yfir götuna til að sækja hana“.

Við fórum yfir auðlindamálin og rörsýnina sem ríkir í þeim málum. Þ.e. það er eins og það séu  bara tvær auðlindir á Íslandi, fiskur í sjó og fiskur í sjókvíum. Hvað sumir landsmenn hafa greiðan og ódýran aðgang að miklum auðlindum en við og aðrir víða á landsbyggðinni njótum þeirra ekki. Þetta var í heildina mjög góður fundur og gott að vita að við eigum þingmann sem sýnir málefnum okkar Eyjamanna áhuga,“ segir Arnar að lokum.