Samgöngur  við Eyjar settar í hættu?
Vestmannaeyjahöfn. Ljóst er að vaxandi umsvif kalla á auknar framkvæmdir.

Ritstjórn

frettir@eyjafrettir.is

Samgönguáætlun 2026 til 2040 gagnrýnd í bæjarstjórn Vestmannaeyja

Ný samgönguáætlun stjórnvalda fyrir árin 2026 til 2040, sem kynnt var í desember hefur vakið mikla óánægju í Vestmannaeyjum. Bæjaryfirvöld telja að áætlunin tryggi ekki nægilegt fjármagn til mikilvægra samgönguinnviða og að þar með sé öryggi og að áreiðanleiki samgangna við Eyjar sé settur í hættu.

Samgönguáætlunin, sem kynnt var af innviðaráðherra, markar stefnu stjórnvalda í uppbyggingu samgangna til næstu 15 ára og inniheldur einnig sérstaka fimm ára aðgerðaáætlun til ársins 2030.

Mikil óánægja með fjárveitingar

Samkvæmt umfjöllun bæjaryfirvalda hallar verulega á Vestmannaeyjar í áætluninni. Sérstaklega er gagnrýnt að framlög til ferjusamgangna dragist saman, en rekstur ferja á að lækka úr 1,7 milljörðum króna í 1,4 milljarða króna.
Telja bæjaryfirvöld að slíkar skerðingar geti haft bein áhrif á þjónustu Herjólfs sem er lífæð samgangna við Eyjar.

Landeyjahöfn undirfjármögnuð

Einnig er bent á að fjárveitingar til dýpkunar Landeyjahafnar séu langt undir þörf. Í áætluninni er gert ráð fyrir um 600 milljónum króna, en í fjárlögum aðeins um 350 milljónum, þrátt fyrir að raunþörf sé talin nær einum milljarði.
Ófullnægjandi viðhald hafnarinnar getur leitt til þess að Herjólfur þurfi oftar að sigla til Þorlákshafnar, sem lengir ferðatíma og eykur óvissu.

Framkvæmdir frestast

Fjölda mikilvægra verkefna er einnig frestað samkvæmt áætluninni. Þar á meðal er ný ekjubrú fyrir Herjólf, sem ekki er áætluð fyrr en árið 2029, auk framkvæmda við Básaskersbryggju sem einnig dragast.
Bæjaryfirvöld telja slíkar tafir óásættanlegar, sérstaklega þar sem sumar framkvæmdir snúa að öryggismálum.

Minni stuðningur við hafnir

Þá er gert ráð fyrir að hlutfall ríkisframlaga til hafnarframkvæmda lækki úr 60% í 40% eftir árið 2028.
Þessi breyting gæti gert sveitarfélaginu erfiðara fyrir að standa undir nauðsynlegum framkvæmdum og endurnýjun búnaðar.

„Ekki í samræmi við loforð“

Bæjaryfirvöld hafa lýst yfir miklum vonbrigðum og telja að uppbygging innviða sé ekki í samræmi við fyrri loforð stjórnvalda.
Þau hyggjast koma athugasemdum sínum á framfæri við Alþingi og kalla eftir breytingum á áætluninni.

Nýjustu fréttir

Bæjarmálin
Samgöngur  við Eyjar settar í hættu?
Úr blaði Eyjafrétta
Gamla myndin – Kartöflugarðar í Eyjum 
Fréttir
Landsbankinn og N1 bætast í hluthafahóp Eyjaganga
Áhugavert
Eló heldur tónleika í Eyjum
Vinnslustöðin
Þórunn Sveinsdóttir VE kveður Eyjar
Tímamót
Rauði krossinn í Eyjum fagnaði 85 árum með opnu húsi
Áhugavert
Sveiflur í veðri og ógnar brim
Fréttir
Gul viðvörun – Austanhríð
Mest lesið

Góð ráð fyrir siglingu

Sjóveiki

Hvað er sjóveiki?

Sjóveiki er misræmi milli skynfæra líkamans sem senda boð til heilans um hreyfingu – kyrrstöðu.

Þegar einstaklingur er úti á sjó þá nema skynjarar í vökvafylltum gangi í innra eyra hreyfingu og senda boð til heilans að einstaklingur sé á hreyfingu. Augun senda hins vegar boð til heilans um að viðkomandi sé kyrr. Heilinn á erfitt með að vinna úr þessum misvísandi og ósamræmdu upplýsingum og sendir skilaboð til magans um að tæma sig – þ.e. veldur uppköstum.

Einkenni sjóveiki eru þreyta, ógleði, svimi, svitakóf og uppköst.

Góð ráð til að hindra sjóveiki:

  • Góð hvíld daginn fyrir brottför. Að fara seint að sofa og snemma um borð í bát fer ekki vel saman ef fólk er hætt við sjóveiki.
  • Forðist áfenga drykki daginn fyrir brottför
  • Forðist djúpsteiktan, brasaðan eða saltan mat daginn fyrir siglingu.
  • Borðið góðan morgunverð. Borðið gjarnan hvítt brauð, hafragraut og ávexti þó ekki sítrus ávexti.
  • Forðist mikið koffein. Mikið kaffi er ekki það sem maganum líkar fyrir sjóferð.
  • Hafðu mat með þér á sjó. Gott er að hafa samlokur með kjúklingi eða kalkún. Kjötið er fitusnautt og brauðið er róandi í maga. Hafðu endilega eitthvað til að grípa í sem er létt í maga. Bananar eru mjög góðir til að narta í ef þú finnur fyrir ógleði en einnig er gott að hafa létt kex eða annað sem er ekki salt eða fitumikið.
  • Drekkið vel af vatni en einnig er gott er að drekka kóla drykki eða engiferöl í sjóferðinni

Lyf við sjóveiki þ.e. lyf sem slá á einkennin og fást án lyfseðils í apóteki.

  • Koffínátín – fæst án lyfseðils
  • Postafen – fæst án lyfseðils
  • Scopolamin plástur – lyfseðilsskyltEinnig má fá armbönd gegn ferðaveiki sem sumir telja að hjálpi.

Önnur ráð:

  • Engifer er jurt sem nýlega hefur fengið aukna athygli vegna þess að því er haldið fram að hún geti slegið á ógleði sem fylgir sjóveiki. Til forna tuggðu kínverskir sjómenn engiferrót til að draga úr sjóveiki. Flest lyf sem virka á ógleði verka á heilann en engifer virkar aðeins á magann. Ráðlagt er að taka 1000 mg. hylki hálftíma fyrir brottför. Einnig má taka eitt eða tvö 500 mg. hylki sem eru til viðbótar á ferðalaginu. Ekki er ráðlagt að drekka coke með engifertöflum.
  • Piparminta og te eru einnig gömul húsráð við ferðaveiki.
  • Sumum finnst betra að taka sýrujafnandi töflur, Alminox eða slíkt áður en þú heldur á sjó og þá er gott að hafa box með út á sjó.

Hvar í skipinu er best að vera o.fl.

  • Minna finnst fyrir hreyfingu og veltingi ef maður er staddur næst miðju bátsins.
  • Mörgum finnst gott að vera í kulda, t.d.að vera úti á dekki og láta vindinn leika um sig.
  • Matarlykt fer illa í þá sem hætt er við sjóveiki og einnig pústið frá bátnum.

Þungun:

Þungaðar konur sem þjást af sjóveiki mega nota koffinátín í litlum skömmtum en best er að ráðfæra sig við lækni eða lyfjafræðing.
Þunguðum konum er ekki ráðlagt að nota engifer þar sem það er ekki staðfest hvort það geti haft skaðleg áhrif á fóstur.

Eyjafréttir
Keyrt af  GDPR Cookie Compliance
Friðhelgisyfirlýsing

Þessi vefsíða notar fótspor til að við getum veitt þér bestu notendaupplifun. Upplýsingar um fótspor eru geymdar í vafranum þínum og framkvæma aðgerðir eins og að þekkja þig þegar þú kemur aftur á vefsíðu okkar og hjálpa teymi okkar að skilja hvaða hluta vefsíðunnar þér finnst áhugaverðast og gagnlegast.