Rannsóknarholan EG-01 á Eiðinu er nú komin niður á 101,3 metra dýpi. Samkvæmt nýrri uppfærslu á vef Eyjaganga er verkefnið komið á betra skrið á ný eftir tafir síðustu daga.

Eyjafréttir greindu áður frá því í síðustu viku að samgönguerfiðleikar milli lands og Eyja væru að hafa áhrif á framgang rannsóknarborana vegna Eyjaganga, þar sem tafir á ferðum höfðu áhrif á verkáætlun og kostnað verkefnisins. Þá var staðan sú að borunin var komin niður á 66,3 metra í þeirri holu sem nú er unnið í. Áður höfðu menn náð niður á 84 metra áður en bakslag varð og hefja þurfti vinnu að hluta til að nýju.

„Við vonumst til þess að við séum nú komin á beinu brautina í boruninni. Holan er orðin mjög stöndug og góð, sem gefur okkur góðar vonir um áframhaldandi framgang verksins,“ er haft eftir Benedikti Óskari Steingrímssyni, jarðfræðingi hjá Völubergi.

Rannsóknarholan EG-01 gegnir lykilhlutverki í undirbúningi Eyjaganga, þar sem markmiðið er að afla ítarlegra upplýsinga um berggrunn og jarðlög á svæðinu.