Embla Harðardóttir, leikmaður kvennaliðs ÍBV í fótbolta, meiddist illa í leik ÍBV og FH í síðustu umferð Bestu deildar kvenna. Hún meiddist eftir rúman hálftíma leik og var strax ljóst að um alvarleg meiðsli væri að ræða því hún var borin af velli á börum. 

Það hefur nú komið í ljós að hún er með slitið fremra krossband í hné en þetta staðfesti hún á Instagram síðu sinni fyrr í dag. Hún mun því ekki leika meira með ÍBV á þessu ári. 

Embla er tvítug og leikur sem miðjumaður. Hún hefur byrjað alla fimm leiki liðsins á þessu tímabili. 

Meiðsli hafa herjað á lið ÍBV í sumar en þær Fridrikka Maria Clementsen, Helena Hekla Hlynsdóttir og Allison Grace Lowrey hafa allar glímt við meiðsli í upphafi tímabils.