Veðurstofan hefur gefið út appelsínugular viðvaranir fyrir Suðurland, Faxaflóa, Suðausturland og Miðhálendið. Áður hafði verið gefin út gul viðvörun vegna veðurs á öllu landinu.

Ef horft er á Suðurland þá tekur sú gula gildi klukkan 7 í fyrramálið. Klukkan 12 á hádegi tekur við appelsínugul viðvörun í landshlutanum og gildir hún til kl. 20.00 samdægurs.

Í viðvörunartexta fyrir appelsínugulu viðvörunina segir: Austan 20-28 m/s og vindhviður staðbundið yfir 40 m/s. Snjókoma eða slydda og skafrenningur með slæmu skyggni og versnandi færð, en víða rigning undir kvöld. Ekkert ferðaveður. Einnig eru líkur á foktjóni og er fólk hvatt til að huga að lausamunum.

Veðurhorfur á landinu næstu daga

Á þriðjudag:
Sunnan 13-20 m/s og skúrir, en úrkomulítið norðaustanlands. Heldur hægari vindur seinnipartinn. Hiti 3 til 9 stig.

Á miðvikudag:
Suðlæg átt 8-15 og rigning, en úrkomulítið á Norðausturlandi. Dregur úr vindi vestantil eftir hádegi. Hiti 2 til 7 stig.

Á fimmtudag:
Suðvestlæg átt 5-13 og skúrir, en kólnar með éljum seinnipartinn. Lengst af þurrt austanlands. Hiti nálægt frostmarki um kvöldið.

Á föstudag:
Austlæg eða breytileg átt og snjókoma eða slydda, en hlýnar með rigningu, fyrst sunnantil. Hiti 0 til 5 stig síðdegis, en norðaustanátt, áfram snjókoma og vægt frost norðvestantil.

Á laugardag:
Gengur í norðlæga átt með éljum, en styttir upp sunnan heiða. Hægari og þurrt austantil fram á kvöld. Kólnandi veður, frost 0 til 7 stig um kvöldið.
Spá gerð: 05.04.2026 08:06. Gildir til: 12.04.2026 12:00.

Veður.is.