Nýr vinnubátur Vestmannaeyjahafnar, Léttir, hlaut nafn sitt við athöfn í höfninni í gær. Fjölmenni var viðstatt þegar báturinn var formlega nefndur. Það kom í hlut Írisar Róbertsdóttur, bæjarstjóra að gefa bátnum nafn. Að lokinni nafngift blessaði séra Viðar Stefánsson skipið og áhöfn þess áður en gestum var boðið til létts veisluhalds á hafnarskrifstofunni.

Léttir er öflugur vinnubátur af gerðinni StanTug 1205 frá Damen, smíðaður árið 2017. Báturinn er 13 metra langur og 5,3 metrar á breidd, með 9 tonna dráttargetu og tvær skrúfur sem auka stjórnhæfni hans við krefjandi aðstæður í höfninni. Tvær Volvo Penta vélar skila saman um 700 hestöflum. Báturinn var keyptur á rétt rúmar 110 milljónir króna.

Óskar Pétur, ljósmyndari Eyjafrétta mætti á svæðið og tók nokkrar myndir. Hægt er að smella á myndirnar hér að neðan til að opna þær stærri.