Skemmtiferðaskipið Insignia er í Vestmannaeyjum í dag, laugardaginn 25. júlí. Skipið kom í morgun og samkvæmt áætlun heldur það aftur úr höfn síðdegis. Það liggur í Friðarhöfn við kantinn framan við Vinnslustöðina. Veðrið leikur við heimamenn og gesti í Eyjum í dag. Sól og hlýindi eru í bænum og margt  fólk á ferli. Farþegar skemmtiferðaskipanna setja svip sinn á bæjarlífið og víða má sjá gesti á göngu og skoða það sem Vestmannaeyjar hafa upp á að bjóða.

Insignia er gert út af Oceania Cruises og er eitt af minni skemmtiferðaskipum félagsins. Skipið er um 181 metri að lengd og tæpir 26 metrar á breidd. Það tekur mest 684 farþega miðað við tvo í klefa og í áhöfn eru um 400 manns. Alls geta því verið rúmlega 1.080 manns um borð þegar skipið er fullnýtt.

Insignia lagði af stað frá Reykjavík í gærkvöldi og eru Vestmannaeyjar fyrsti viðkomustaðurinn í þessari siglingu. Frá Eyjum liggur leiðin til Færeyja, þar sem komið verður við í Þórshöfn og Runavík, áður en haldið verður aftur til Íslands.

Á áframhaldandi siglingu umhverfis landið verður meðal annars komið við á Djúpavogi, Eskifirði, Akureyri, Ísafirði og Grundarfirði. Ferðinni lýkur síðan í Reykjavík 3. ágúst.

Insignia var smíðað árið 1998 og hét upphaflega R One. Skipið er rúmlega 30 þúsund brúttótonn og siglir undir fána Marshall-eyja.

Seabourn Venture í Vestmannaeyjum

Lúxusleiðangursskipið Seabourn Venture er einnig í Vestmannaeyjum í dag og liggur við Nausthamarsbryggju. Skipið var tekið í notkun árið 2022 og er sérstaklega hannað fyrir leiðangurssiglingar á afskekktum slóðum, meðal annars á norðurslóðum.

Seabourn Venture er um 170 metra langt, um 23 þúsund brúttótonn og getur tekið allt að 264 farþega. Um borð er einnig fjölmenn áhöfn. Skipið er ísvarið og búið sérstökum leiðangursbúnaði, meðal annars Zodiac-bátum og kajökum. Vestmannaeyjar eru meðal síðustu viðkomustaða skipsins í ferðinni áður en haldið er til Reykjavíkur.

Insignia liggur við Friðarhöfn en i dag eru tvö skemmtiferðaskip í höfn, fjölda ferðamanna á ferli og sól og hlýindi er sannkölluð sumarstemning í Vestmannaeyjum í dag.