Halldór tekur okkur með í flugferð yfir Heimaey í nýjasta myndbandi sínu, Fallegur dagur. Í texta við upphaf myndbandsins kemur fram að hann tileinki lagið og myndbandið elsku besta bróður sínum og vini, Sigurði Lárusi (Sidda). Sú hlýja kveðja gefur ferðinni persónulegan blæ.

Flugið hefst austur á eyju, á athafnasvæði Laxeyjar, þar sem svokallað seiðaskip liggur við akkeri rétt fyrir utan Viðlagafjöru. Þaðan er haldið yfir byggðina og við fáum að sjá bæinn frá sjónarhorni sem gefur kunnuglegum slóðum nýja ásýnd.

Fyrst flýgur Halldór yfir austasta hluta byggðarinnar en færir sig síðan vestar í bæinn. Hús og götur mynda samfellda heild þegar horft er yfir þau úr lofti og gefst áhorfendum tími til að virða fyrir sér bæinn og rifja upp sínar eigin tengingar við staðina sem sjást á leiðinni.

Ferðinni lýkur vestur á Hamri. Fallegur dagur er þannig bæði flugferð yfir heimabyggðina og hlý persónuleg kveðja til bróður og vinar.