Valið á Stofnun ársins 2021 var tilkynnt á hátíð Sameykis í gær þann 16. mars 2022 en titlana Stofnun ársins og Stofnun ársins – borg og bær hljóta þær stofnanir sem þykja skara fram úr í þeim þáttum sem könnun Sameykis náði yfir að mati starfsmanna þeirra.

Í flokki minnstu stofnananna eru fyrirmyndarstofnanir Jafnréttisstofa, sem einnig var í fyrsta sæti í flokki minnstu stofnananna í síðustu mælingu, Framhaldsskólinn í Vestmannaeyjum, Menntaskólinn á Tröllaskaga, Geislavarnir ríkisins og Héraðsdómur Reykjaness sem verma fimm efstu sætin. Framhaldsskólinn í Vestmannaeyjum og Menntaskólinn á Tröllaskaga voru í tveimur efstu sætunum í síðustu mælingu í flokki millistórra stofnana (með 20-49 starfsmenn).

Könnunin náði til um 31 þúsund starfsmanna í opinberri þjónustu, bæði hjá ríki, Reykjavíkurborg, sveitarfélögunum og sjálfseignarstofnunum. Hún er unnin í samstarfi við Fjármála- og efnahagsráðuneytið og Mannauðsdeildar Reykjavíkurborgar og gefur mikilvægar upplýsingar um stöðu starfsmanna á opinbera vinnumarkaðnum. Í henni eru þátttakendur spurðir út í níu þætti í starfsumhverfinu þ.e. trúverðugleika stjórnenda, starfsanda, launakjör, vinnuskilyrði, sveigjanleika í starfi, sjálfstæði í starfi, ímynd stofnunar, ánægju og stolt og jafnrétti. Markmiðið með að velja fyrirmyndarstofnanir er að hvetja stjórnendur stofnana til að huga að mannauðsmálum og auka umræðu um aðbúnað og líðan starfsmanna á vinnustöðum. Alls fengust gild svör frá rúmlega 13.300 starfsmönnum og svarhlutfallið var 43 prósent.