Bæjarráð skipaði þann 29. september sl., sérstakan starfshóp um lagningu nýrrar vatnslagnar til Vestmannaeyja. Hópurinn er skipaður Írisi Róbertsdóttur, bæjarstjóra, Eyþóri Harðarsyni, fulltrúa bæjarráðs, framkvæmdastjóra umhverfis- og framkvæmdasviðs og framkvæmdastjóra stjórnsýslu- og fjármálasviðs.

Þann 6. október sl., átti bæjarráð fund með stjórn og framkvæmdastjórn HS veitna, m.a. um nýja vatnsleiðslu til Vestmannaeyja. Fulltrúar Vestmannaeyjabæjar gerðu fulltrúum HS veitna grein fyrir þeim viðbrögðum sem innviðaráðuneytið hafði sýnt Vestmannaeyjabæ við beiðni um fjáhagslegan stuðning við nýja vatnslögn til Vestmannaeyja. Fram kom á fundi aðila þjóðhagsleg nauðsyn þess að ráðist verði í slíka framkvæmd og jákvætt tekið í þá tillögu að hefja undirbúning að lagningu nýrrar lagnar. Ákveðið var að Vestmannaeyjabær sendi stjórn HS veitna formlega beiðni um samstarf aðila um undirbúning lagnarinnar.

Starfshópurinn sem skipaður var af bæjarráði kom til fundar þann 18. október sl. Þar voru m.a. samþykkt drög að bréfi til stjórnar HS veitna um samstarf um að hefja undirbúning að lagningu nýrrar vatnslagnar. Bréfið hefur verið sent og óskað eftir að hefja undirbúning sem fyrst svo hægt verði að leggja nýja vatnslögn sumarið 2024.