Ísfisktogarinn Gullver NS landaði 76 tonnum á Seyðisfirði á þriðjudaginn og Vestmannaeyjaskipin Bergur VE og Vestmannaey VE lönduðu bæði fullfermi í Neskaupstað í gær. Gullver hóf veiðar austur af landinu og endaði túrinn á hinu svonefnda Gula teppi. Vestmannaeyjaskipin hófu veiðar suður ef landinu en enduðu einnig á Gula teppinu. Gula teppið er á Skrúðsgrunni eða austan við Hvalbaksgrunn og nafnið kemur til vegna þess að trollið verður loðið af gulum sjávargróðri þegar veitt er þar.

Bjarni Ólafur Hjálmarsson, skipstjóri á Gullver, segir að aflinn hafi mest verið þorskur og ýsa. „Við reyndum fyrir okkur á Glettingi og á Tangaflaki en enduðum á Gula teppinu. Fiskiríið var rólegt framan af en glæddist í lokin,“ segir Bjarni Ólafur.

Ragnar Waage Pálmason, skipstjóri á Bergi, segir að þeir hafi hafið veiðar í Breiðamerkurdýpinu. „Síðan var haldið á Hvalbaksgrunn og þar voru tekin nokkur hol. Veiðin var þokkaleg í upphafi en síðan dró úr henni. Þá lá leiðin á Gula teppið og klárað. Aflinn er mest ýsa, þorskur og ufsi,“ segir Ragnar.

Birgir Þór Sverrisson, skipstjóri á Vestmannaey, segir að þeir hafi einnig hafið veiðar í túrnum á Breiðamerkurdýpi. „Þar tókum við tvær birtur en síðan var haldið á Ingólfshöfðann þar sem við vorum eina nótt. Þá reyndum við fyrir okkur á Hvalbaksgrunni en enduðum á Gula teppinu á Skrúðsgrunni. Þetta er ágætis fiskur sem fékkst í túrnum. Í upphafi var skítabræla en þegar komið var austur fyrir var himinsins blíða. Aflinn er mest ýsa og þorskur, dálítið af ufsa en minna af öðrum tegundum,“ segir Birgir Þór.