Samningurinn er án efa einn sá stærsti sem knattspyrnulið á Íslandi hefur gert og gerir ÍBV kleift að efla starfsemi sína umtalsvert á næstu misserum. Markmið liðsins er að efla starf knattspyrnudeildarinnar og að festa liðið í sessi sem eitt af bestu liðum í úrvalsdeild knattspyrnunnar.

Ferðakostnaður íþróttaliða af landsbyggðinni hefur reynst gríðarlega mikill og sífellt erfiðara er fyrir lið af landsbyggðinni að standa straum af þeim kostnaði. Mörg liða af landsbyggðinni standa því höllum fæti gagnvart liðum af höfuðborgarsvæðinu þegar kemur að rekstri félaganna. Styrktarfé er þessum íþróttaliðum afar mikilvægt og gerir þeim kleift að huga betur að innviðum íþróttafélagsins og beinu íþróttastarfi.

Toyota á Íslandi hefur um árabil haft þá stefnu að styðja við ýmiss konar íþróttastarf á landinu og með þessum styrk vill Eyjamaðurinn Magnús Kristinsson undirstrika þá stefnu en hann er mikill áhugamaður um knattspyrnu eins og vel er þekkt. Toyota á Íslandi fagnar þessum samningi og óskar þess að markmið ÍBV nái fram að ganga og hvetur um leið önnur fyrirtæki að styrkja mikilvægt starf íþróttaliða á landinu.

Fréttatilkynning