Ísfisktogararnir Vestmannaey VE og Bergey VE lönduðu báðir fullfermi í Þorlákshöfn í gærmorgun. Um mjög stuttar veiðiferðir var að ræða en þær tóku einungis um 30 tíma höfn í höfn. Veitt var á Selvogsbanka, nánar tiltekið vestan við Surt og sunnan við svonefnda Klöpp. Aflinn var langmest þorskur, stór og fallegur vertíðarfiskur.

Skipstjórarnir, Ragnar Waage Pálmason á Bergey og Birgir Þór Sverrisson á Vestmannaey, sögðu að veðrið hafi ekki verið sérlega gott. Megnið af tímanum hafi verið haugasjór og almennt heldur erfiðar aðstæður veðurfarslega en vel hafi hins vegar gengið að fiska og gjarnan fengist um 10 tonn í hverju holi.

Bæði skip héldu til veiða frá Þorlákshöfn í gærkvöldi og reiknað er með að þau landi á ný um helgina, að því er segir í frétt á vef Síldarvinnslunnar.