Stjórn SASS og Bjarni Guðmundsson framkvæmdastjóri hafa komist að samkomulagi um starfslok hans hjá samtökunum. Bjarni, sem hefur verið framkvæmdastjóri SASS í tíu ár, hefur þegar látið af störfum. Þetta kemur fram í tilkynningu á heimasíðu SASS.

„Ég er þakklátur fyrir að hafa fengið tækifæri til að byggja upp samtök sveitarfélaga á Suðurlandi sem sinna mikilvægu hlutverki í byggðaþróun. Ég er stoltur af þeim árangri sem samtökin hafa náð í þessum grósku- og kraftmikla landshluta. Framtíðin er svo sannarlega björt fyrir Sunnlendinga og tækifærin fjölbreytileg í atvinnumálum, listum og menningu,“ segir Bjarni. „Góður árangur við að gæta hagsmuna sveitarfélaga og íbúa Suðurlands, sem hefur stuðlað að jákvæðri byggðaþróun, hefði ekki náðst nema með samhentu átaki allra. Ég þakka starfsfólki og stjórnarmönnum SASS, kjörnum fulltrúum í sveitarstjórnum, íbúum og forráðamönnum fyrirtækja fyrir samstarfið á liðnum árum.“ segir Bjarni.

„Stjórn SASS þakkar Bjarna Guðmundssyni fyrir framlag hans við að styrkja stoðir atvinnu- og mannlífs á Suðurlandi og óskar honum velfarnaðar í því sem hann tekur sér fyrir hendur,“ segir Anton Kári Halldórsson, stjórnarformaður SASS.