Eyjakonan Embla Harðardóttir hefur samið við knattspyrnudeild ÍBV til loka árs 2027. Fram kemur í frétt á vefsíðu ÍBV að Embla hafi spilað upp alla yngri flokkana hjá ÍBV og verið lykilmaður í sínum liðum síðustu ár.

Embla er 18 ára gömul. Hún hefur leikið 26 meistaraflokksleiki fyrir ÍBV. Þrettán þeirra lék hún í Lengjudeildinni síðasta sumar, en á sama tíma var hún lykilmaður í U20-ára liði ÍBV sem vann sér sæti í A-deild að nýju. Segir jafnframt í fréttinni að tilhlökkun sé innan félagsins til samstarfsins við Emblu á komandi árum.