Eyjafréttir 50 ára og enn á vaktinni

„Gleðilegt ár öll sömul og takk fyrir samskiptin á liðnum árum. En mest þakkir fyrir að mæta og taka þátt í þessu með okkur. Afhending Fréttapýramídanna hefur í mínum huga verið einskonar uppskeruhátíð Eyjafrétta. Er um leið skemmtilegt uppbrot á hversdeginum í Eyjum í upphafi árs. Við stöndum á tímamótum því Fréttir/Eyjafréttir fagna 50 ára afmæli á þessu ári og verður þess minnst með ýmsum hætti,“ sagði Ómar Garðarsson þegar hann ávarpaði gesti við Afhendingu Fréttapýramídanna 2023 í Eldheimum í síðustu viku.

Að mati Ómars eru Eyjafréttir og fréttasíðan eyjafréttir.is ein af stoðum samfélagsins. Til að svo verði áfram er að ýmsu að huga. Fjölmiðlun, ekki bara hér á landi heldur um allan heim stendur á tímamótum. Afmælisárið verður m.a. nýtt til að kanna þá möguleika sem eru í stöðunni. Tækifærin eru til staðar en margt bendir til þess að prentuð blöð heyri brátt sögunni til. Til að missa ekki af vagninum þarf að standa vaktina og það ætlum við að gera,“ sagði Ómar.

Þriðja vaktin

Sjálfur sagðist hann vera á þriðju vaktinni sem ritstjóri Eyjafrétta. Hann kvað starfið vera á réttri leið, þökk sé öflugu samstarfsfólki. „Hvað sjálfan mig varðar er ég ekki maður framtíðarinnar, eða eins og Kári Bjarnason, stjórnarmaður og vinur orðaði svo pent á stjórnarfundi; Hann Ómar á afmæli einu sinni á ári. Það á við okkur öll en með hærri aldri telur hver afmælisdagur meira. En ég er ekki hættur. Hef metnað til að klára afmælisárið og stefnt er að myndarlegum blöðum á árinu. Ekki síst í kringum 50 ára afmælið í júní.“

Ómar sagði okkur lifa á skrýtnum tímum þar sem þeir sem hæst öskra nái athyglinni en fólk sé skynsamt. „Á þeirri staðreynd byggi ég trú mína á bjarta framtíð okkar. Ísland er ekki verst í heimi þó til séu öfl í landinu sem telja sér hag í að níða allt niður sem íslenskt er. Það er heldur ekki ásættanlegt að menn séu nýddir niður í einhverju sem á að heita skemmtiþáttur,“ sagði Ómar. Vísaði þar til Áramótaskaups Sjónvarpsins þar sem Kristjáni Loftssyni er lýst sem blóðþyrstum drápara og Bjarni Ben er réttdræpur.

„Ég vil svo að endingu þakka öllum, lesendum og velunnurum Eyjafrétta fyrir samfylgdina frá 1986 þegar ég steig mín fyrstu skref á Fréttum. Oft mikið puð, stundum gustað hressilega en aldreii leiðinlegt.“

Nýjustu fréttir

Íþróttir
Elmar áfram hjá Nordhorn-Lingen
Íþróttir
Róbert hjá ÍBV næstu tvö árin
Fréttir
Framkvæmdir langt komnar í Íþróttamiðstöðinni
Aðsent
Skákþing Vestmannaeyja: Úrslitin ráðast í síðustu umferðunum
Vestmannaeyjabær
Yfir 90% íbúa ánægðir
Fréttatilkynning
Bríet kemur fram á Hljómey
Stjórnmál
Sæunn Magnúsdóttir gengur til liðs við Miðflokkinn
Úr blaði Eyjafrétta
Framkvæmdir hafnar við Áshamar 77  
Mest lesið

Góð ráð fyrir siglingu

Sjóveiki

Hvað er sjóveiki?

Sjóveiki er misræmi milli skynfæra líkamans sem senda boð til heilans um hreyfingu – kyrrstöðu.

Þegar einstaklingur er úti á sjó þá nema skynjarar í vökvafylltum gangi í innra eyra hreyfingu og senda boð til heilans að einstaklingur sé á hreyfingu. Augun senda hins vegar boð til heilans um að viðkomandi sé kyrr. Heilinn á erfitt með að vinna úr þessum misvísandi og ósamræmdu upplýsingum og sendir skilaboð til magans um að tæma sig – þ.e. veldur uppköstum.

Einkenni sjóveiki eru þreyta, ógleði, svimi, svitakóf og uppköst.

Góð ráð til að hindra sjóveiki:

  • Góð hvíld daginn fyrir brottför. Að fara seint að sofa og snemma um borð í bát fer ekki vel saman ef fólk er hætt við sjóveiki.
  • Forðist áfenga drykki daginn fyrir brottför
  • Forðist djúpsteiktan, brasaðan eða saltan mat daginn fyrir siglingu.
  • Borðið góðan morgunverð. Borðið gjarnan hvítt brauð, hafragraut og ávexti þó ekki sítrus ávexti.
  • Forðist mikið koffein. Mikið kaffi er ekki það sem maganum líkar fyrir sjóferð.
  • Hafðu mat með þér á sjó. Gott er að hafa samlokur með kjúklingi eða kalkún. Kjötið er fitusnautt og brauðið er róandi í maga. Hafðu endilega eitthvað til að grípa í sem er létt í maga. Bananar eru mjög góðir til að narta í ef þú finnur fyrir ógleði en einnig er gott að hafa létt kex eða annað sem er ekki salt eða fitumikið.
  • Drekkið vel af vatni en einnig er gott er að drekka kóla drykki eða engiferöl í sjóferðinni

Lyf við sjóveiki þ.e. lyf sem slá á einkennin og fást án lyfseðils í apóteki.

  • Koffínátín – fæst án lyfseðils
  • Postafen – fæst án lyfseðils
  • Scopolamin plástur – lyfseðilsskyltEinnig má fá armbönd gegn ferðaveiki sem sumir telja að hjálpi.

Önnur ráð:

  • Engifer er jurt sem nýlega hefur fengið aukna athygli vegna þess að því er haldið fram að hún geti slegið á ógleði sem fylgir sjóveiki. Til forna tuggðu kínverskir sjómenn engiferrót til að draga úr sjóveiki. Flest lyf sem virka á ógleði verka á heilann en engifer virkar aðeins á magann. Ráðlagt er að taka 1000 mg. hylki hálftíma fyrir brottför. Einnig má taka eitt eða tvö 500 mg. hylki sem eru til viðbótar á ferðalaginu. Ekki er ráðlagt að drekka coke með engifertöflum.
  • Piparminta og te eru einnig gömul húsráð við ferðaveiki.
  • Sumum finnst betra að taka sýrujafnandi töflur, Alminox eða slíkt áður en þú heldur á sjó og þá er gott að hafa box með út á sjó.

Hvar í skipinu er best að vera o.fl.

  • Minna finnst fyrir hreyfingu og veltingi ef maður er staddur næst miðju bátsins.
  • Mörgum finnst gott að vera í kulda, t.d.að vera úti á dekki og láta vindinn leika um sig.
  • Matarlykt fer illa í þá sem hætt er við sjóveiki og einnig pústið frá bátnum.

Þungun:

Þungaðar konur sem þjást af sjóveiki mega nota koffinátín í litlum skömmtum en best er að ráðfæra sig við lækni eða lyfjafræðing.
Þunguðum konum er ekki ráðlagt að nota engifer þar sem það er ekki staðfest hvort það geti haft skaðleg áhrif á fóstur.

Eyjafréttir
Keyrt af  GDPR Cookie Compliance
Friðhelgisyfirlýsing

Þessi vefsíða notar fótspor til að við getum veitt þér bestu notendaupplifun. Upplýsingar um fótspor eru geymdar í vafranum þínum og framkvæma aðgerðir eins og að þekkja þig þegar þú kemur aftur á vefsíðu okkar og hjálpa teymi okkar að skilja hvaða hluta vefsíðunnar þér finnst áhugaverðast og gagnlegast.