Kjördæmissamband Framsóknar í Suðurkjördæmi samþykkti í dag framboðslista Framsóknarflokksins í Suðurkjördæmi á fjölmennu kjördæmisþingi á Hótel Örk í Hveragerði.

Fram kemur í tilkynningu frá flokknum að listinn samanstandi af fólki með mikla reynslu auk nýrra aðila sem styrkja hóp framsóknarfólks verulega um land allt.

Í fyrsta sæti er Halla Hrund Logadóttir, orkumálastjóri Orkustofnunar. Í öðru sæti er Sigurður Ingi Jóhannsson, formaður Framsóknar, fjármála- og innviðaráðherra. Í þriðja sæti er Jóhann Friðrik Friðriksson, alþingismaður. Í fjórða sæti er Fida Abo Libdeh, orku- og umhverfistæknifræðingur og í því fimmta er Sigurður E. Sigurjónsson, íþrótta- og æskulýðsfulltrúi.

Tilbúin til að takast á við áskoranir

Á fundinum sagði Sigurður Ingi Jóhannsson, fjármála- og efnahagsráðherra meðal annars:

,,Ég er stoltur yfir sterkum lista Suðurkjördæmis með öflugu fólki sem er fjölbreyttur með sterkri liðsheild og var samþykktur á kjördæmisþingi Kjördæmissambands Framsóknarfélaganna í Suðurkjördæmi. Framsókn er tilbúin til að takast á við áskoranir og halda áfram að vinna að lausnum sem bæta samfélagið. Hlakka til næstu daga og vikna,“ sagði Sigurður Ingi Jóhannsson.

„Verðum að passa uppá auðlindir okkar, eignarhald þeirra og ábyrga nýtingu”

Halla Hrund Logadóttir, nýr oddviti Framsóknar í kjördæminu sagði í ræðu sinni meðal annars:

,,Ég tek við fyrsta sæti í Suðurkjördæmi full af auðmýkt og þakklæti. Hér í dag samþykktum við frábæran framboðslista af fólki sem er tilbúið að vinna af krafti fyrir samfélagið og ég hlakka til að starfa með ásamt öflugu fólki um allt land. Við verðum að passa uppá auðlindir okkar, eignarhald þeirra og ábyrga nýtingu fyrir samfélög um allt land. Það er mitt stóra erindi í pólitík. Hjartað slær sömuleiðis ört fyrir landbúnað með nýsköpun og samvinnu að leiðarljósi. Einnig vil ég leggja áherslu á húsnæðismál og geðheilbrigði ungs fólks. Það þurfa allir að fá tækifæri til að finna sinn farveg óháð bakgrunni, þannig verðum við sterkari sem heild.

Framsókn sem er í mínum huga holdgervingur hins dugmikla Íslendings, rödd skynsemi og seiglu á miðjunni sem hefur sýnt að getur unnið þvert á hagsmuni og pólitík. Það er akkúrat það sem við þurfum til sóknar og sátta í heimi þar sem átök og öfgar í umræðu eru sífellt algengari,“ sagði Halla Hrund Logadóttir.

Listi Framsóknar í Suðurkjördæmi í heild sinni:

1. Halla Hrund Logadóttir, orkumálastjóri Reykjavík

2. Sigurður Ingi Jóhannsson, fjármála- og innviðaráðherra Hrunamannahreppur

3. Jóhann Friðrik Friðriksson, alþingismaður og lýðheilsufræðingur Reykjanesbær

4. Fida Abu Libdeh, orku- og umhverfistæknifræðingur og frumkvöðull Reykjanesbær

5. Sigurður E. Sigurjónsson, íþrótta- og æskulýðsfulltrúi Kirkjubæjarklaustur

6. Halldóra Fríða Þorvaldsdóttir, formaður bæjarráðs & varaþingmaður Reykjanesbær

7. Lilja Einarsdóttir, hjúkrunarforstjóri Rangárþing eystra

8. Geir Jón Þórisson, fyrrverandi yfirlögregluþjónn Vestmannaeyjar

9. Vilhjálmur R. Kristjánsson, þjónustustjóri Grindavík

10. Iða Marsibil Jónsóttir, sveitarstjóri og varaþingmaður Grímsnes og Grafningshreppur

11. Margrét Ingólfsdóttir, kennari Sveitarfélagið Hornafjörður

12. Anton Kristinn Guðmundsson, bæjarfulltrúi, Suðurnesjabær

13. Ellý Tómasdóttir, forvarna- og bæjarfulltrúi, Árborg

14. Einar Freyr Elínarson, sveitarstjóri Vík í Mýrdal

15. Ingibjörg Ingvadóttir, lögmaður og háskólakennari Þorlákshöfn

16. Hafdís Ásgeirsdóttir, deildarstjóri á leikskóla Rangárþingi ytra

17. Jón K. Bragason Sigfússon, matreiðslumeistari Bláskógabyggð

18. Drífa Sigfúsdóttir, heldri borgari Reykjanesbæ

19. Eiríkur Vilhelm Sigurðsson, sviðsstjóri Kömbum Rangárþingi ytra

20. Silja Dögg Gunnarsdóttir, viðskiptastjóri og fyrrv. alþingismaður Reykjanesbær