Tekjur í sjávarútvegi jukust um 73 milljarða frá árinu 2021 til 2022 eða um 23,8% en á sama tíma nam hækkun á íslenskum sjávarafurðum 18,7%. Hagnaður ársins 2022 var 67 milljarðar króna, um tveimur milljörðum meiri en 2021 og reiknaður tekjuskattur var 17 milljarðar króna. Skuldastaða sjávarútvegsfyrirtækja hækkaði um 4,4 milljarða á árinu og fór í 482 milljarða króna. Þá námu fjárfestingar á árinu 31 milljarði króna og voru hærri en arðgreiðslur ársins sem námu 22,5 milljörðum króna.

Þetta kom fram í yfirliti sem Jónas Gestur Jónasson, löggiltur endurskoðandi og meðeigandi Deloitte, flutti á Sjávarútvegsdegnum sem haldinn var í síðustu viku. Fjallað er um málið á vef Fiskifrétta. Heildarafli jókst um 22,4% milli áranna, fór úr 147 þúsund tonnum í 450 þúsund tonn og munaði þar mest um aukningu í loðnuveiðum.

Í máli Jónasar kom fram að mjög góð EBITDA, sem er afkoma fyrirtækja áður en tekið er tillit til vaxtagreiðslna og vaxtatekna, skattgreiðslna og afskrifta, hafi verið árin 2019 til 2022 og raunar var EBITDA sú hæsta nokkru sinni árið 2022, fór úr 27% 2021 í 29% 2022.

Veiðigjöld 7,9 milljarðar
Jónas dró upp mynd EBIDTA sjávarútvegsfyrirtækja fyrir sex tímabil sem ná til seinni hluta síðustu aldar og fyrstu áratugi þessarar aldar sem sýnir með greinilegum hætti hvernig greinin hefur náð að eflast með breytingum í fiskveiðistjórnun. Fyrsta tímabilið nær frá 1981 til 1983, eða fyrir innleiðingu kvótakerfisins, og var EBIDTA yfir þetta tímabil að meðaltali 7%. Á tímabilinu 1984-1991 fyrir frjálst framsal aflaheimilda var hún 15% og yfir þriðja tímabilið, frá 1992 til 2007, var hún 20%. Tímabilið 2008 til 2012, sem einkenndist af veiku gengi íslensku krónunnar, var EBIDTA að meðaltali 29%. 2013 til 2019 fyrir Covid 19 var hún 23%. 2020 til 2022 var hún að meðaltali 27%.

Síðustu fimm ár, þ.e. 2018-2022, námu bein opinber gjöld sjávarútvegsfélaga að meðaltali 22 milljörðum á ári og fóru hæst í 27,4 milljarða árið 2022. Þar af var tekjuskattur það ár 13,9 milljarðar, veiðigjöld 7,9 milljarðar og tryggingagjald 5,6 milljarðar.