Kristrún Frostadóttir formaður Samfylkingar og Jóhann Páll Jóhannsson alþingismaður héldu opinn fund í Eyjum í gær. Undanfarna daga hefur Kristrún ferðast um landið ásamt þingmönnum flokksins og efnt til 18 opinna funda um húsnæðis- og kjaramál.

Kappsmál hjá okkur að opna málefnastarfið

„Vestmannaeyjar eru góður fundarstaður og það er alltaf gaman að koma og taka púlsinn á Eyjamönnum,“ segir Kristrún í samtali við Eyjafréttir. Háir vextir og verðbólga voru ofarlega á baugi en einnig var töluvert rætt um samgöngur.

„Það hefur verið kappsmál hjá okkur að opna málefnastarf Samfylkingarinnar upp á gátt þannig að fólk um allt land geti tekið þátt í að leggja grunn að áherslum og forgangsröðun flokksins,“ segir Kristrún Frostadóttir.

Hlökkum til að kynna afrakstur vinnunnar

„Heilbrigðismálin voru í forgrunni í fyrra, svo atvinna og samgöngur síðasta vetur og nú erum við að taka húsnæðis- og kjaramálin föstum tökum,“ segir Jóhann Páll Jóhannsson þingmaður sem var með Kristrúnu á fundinum og leiðir stýrihóp flokksins um húsnæðis- og kjaramál.

„Við erum meðal annars að kortleggja hvernig megi leiðrétta markaðsbresti á húsnæðismarkaði og styðja betur við fyrstu kaupendur. Svo eru almannatryggingarnar stór þáttur í þessari vinnu. Þar viljum við stíga afgerandi skref til að tryggja að eldra fólk njóti ríkari ávinnings af því að hafa greitt í lífeyrissjóði um langa ævi. Við hlökkum til að kynna afrakstur vinnunnar í október.” segir Jóhann Páll.

Spontant útifundur í kjölfarið

Hér að neðan eru myndir frá fundinum sem og frá spontant ‚útifundi‘ sem Kristrún átti með Félagi skipa- og bátaáhugamanna, en sá félagsskapur var í heimsókn í Vestmannaeyjum og vildi ná spjalli við Kristrúnu. Að sjálfsögðu bauðst svo Kristrúnu að halda á lundapysju líkt og sjá má á myndum hér að neðan.