Lagt til að ráðist verði í könnunarveiðar á humri

Ritstjórn

frettir@eyjafrettir.is

Hafrannsóknastofnun leggur til að humarveiðar verði áfram bannaðar árið 2026, en að ráðist verði í sérstakar könnunarveiðar til að afla betri gagna um ástand stofnsins.

Tillagan byggir á varúðarsjónarmiðum og óvissu í mælingum, þar sem misræmi er á milli vísitölu humarholna og niðurstaðna úr togleiðöngrum. Með könnunarveiðum er ætlunin að fá skýrari mynd af aflabrögðum og stærðarsamsetningu stofnsins.

Hægur vöxtur og minni framleiðni við Ísland

Samkvæmt tækniskýrslu Hafrannsóknastofnunar er íslenski humarstofninn við norðurmörk útbreiðslu tegundarinnar í Norður-Atlantshafi. Það hefur veruleg áhrif á líffræði hans. Æxlunarferill kvendýra tekur að jafnaði tvö ár hér við land, samanborið við eitt ár í hlýrri sjó suðar í Evrópu. Þetta veldur hægari vexti og minni framleiðni stofnsins, sem kallar á varfærnari nýtingu.

Þá hefur sókn í humarveiðar dregist verulega saman á undanförnum árum og voru aðeins örfá skip eftir í veiðunum áður en bann var sett á árið 2022.

Merki um bata – en óvissa enn til staðar

Nýjustu mælingar sýna að þéttleiki humarholna jókst árið 2025, sérstaklega við Suðausturland, þar sem hæstu gildi mældust í Skeiðarár-, Breiðarmerkur-, Hornfjarðar- og Lónsdjúpi.

Þrátt fyrir þessa aukningu bendir Hafrannsóknastofnun á að stofninn hafi áður verið í sögulegu lágmarki og að nýliðun hafi verið lítil um langt skeið. Því sé enn óvissa um raunverulega stöðu stofnsins.

Stórþari nýttur með hóflegum hætti

Samhliða humarráðgjöfinni leggur stofnunin til að heimiluð verði nýting á stórþara við Norðurland upp á um 46 þúsund tonn, sem samsvarar um tveimur prósentum af áætluðum lífmassa. Átta svæði eru undanskilin nýtingu vegna mikilvægs vistfræðilegs hlutverks, meðal annars fyrir seli og fuglalíf, og verða þau nýtt til samanburðar við nýtingarsvæði.

Tilkynning Hafrannsóknastofnunnar.

Nýjustu fréttir

Sjávarútvegur
Lagt til að ráðist verði í könnunarveiðar á humri
Fréttir
Vel heppnaðri loðnuvertíð lokið
Stjórnmál
Jón Þór leiðir lista Miðflokksins – Sæunn er bæjarstjóraefnið
Herjólfur
Fyrri ferð föstudags felld niður
Íþróttir
Elliði Snær markahæstur gegn Svíum
Fréttir
Laxey á Seafood Expo North America
Úr blaði Eyjafrétta
Trúin og andlegt starf styrkur í sorginni
Íþróttir
Heimir heldur áfram með Írland – samningur til 2028
Mest lesið

Góð ráð fyrir siglingu

Sjóveiki

Hvað er sjóveiki?

Sjóveiki er misræmi milli skynfæra líkamans sem senda boð til heilans um hreyfingu – kyrrstöðu.

Þegar einstaklingur er úti á sjó þá nema skynjarar í vökvafylltum gangi í innra eyra hreyfingu og senda boð til heilans að einstaklingur sé á hreyfingu. Augun senda hins vegar boð til heilans um að viðkomandi sé kyrr. Heilinn á erfitt með að vinna úr þessum misvísandi og ósamræmdu upplýsingum og sendir skilaboð til magans um að tæma sig – þ.e. veldur uppköstum.

Einkenni sjóveiki eru þreyta, ógleði, svimi, svitakóf og uppköst.

Góð ráð til að hindra sjóveiki:

  • Góð hvíld daginn fyrir brottför. Að fara seint að sofa og snemma um borð í bát fer ekki vel saman ef fólk er hætt við sjóveiki.
  • Forðist áfenga drykki daginn fyrir brottför
  • Forðist djúpsteiktan, brasaðan eða saltan mat daginn fyrir siglingu.
  • Borðið góðan morgunverð. Borðið gjarnan hvítt brauð, hafragraut og ávexti þó ekki sítrus ávexti.
  • Forðist mikið koffein. Mikið kaffi er ekki það sem maganum líkar fyrir sjóferð.
  • Hafðu mat með þér á sjó. Gott er að hafa samlokur með kjúklingi eða kalkún. Kjötið er fitusnautt og brauðið er róandi í maga. Hafðu endilega eitthvað til að grípa í sem er létt í maga. Bananar eru mjög góðir til að narta í ef þú finnur fyrir ógleði en einnig er gott að hafa létt kex eða annað sem er ekki salt eða fitumikið.
  • Drekkið vel af vatni en einnig er gott er að drekka kóla drykki eða engiferöl í sjóferðinni

Lyf við sjóveiki þ.e. lyf sem slá á einkennin og fást án lyfseðils í apóteki.

  • Koffínátín – fæst án lyfseðils
  • Postafen – fæst án lyfseðils
  • Scopolamin plástur – lyfseðilsskyltEinnig má fá armbönd gegn ferðaveiki sem sumir telja að hjálpi.

Önnur ráð:

  • Engifer er jurt sem nýlega hefur fengið aukna athygli vegna þess að því er haldið fram að hún geti slegið á ógleði sem fylgir sjóveiki. Til forna tuggðu kínverskir sjómenn engiferrót til að draga úr sjóveiki. Flest lyf sem virka á ógleði verka á heilann en engifer virkar aðeins á magann. Ráðlagt er að taka 1000 mg. hylki hálftíma fyrir brottför. Einnig má taka eitt eða tvö 500 mg. hylki sem eru til viðbótar á ferðalaginu. Ekki er ráðlagt að drekka coke með engifertöflum.
  • Piparminta og te eru einnig gömul húsráð við ferðaveiki.
  • Sumum finnst betra að taka sýrujafnandi töflur, Alminox eða slíkt áður en þú heldur á sjó og þá er gott að hafa box með út á sjó.

Hvar í skipinu er best að vera o.fl.

  • Minna finnst fyrir hreyfingu og veltingi ef maður er staddur næst miðju bátsins.
  • Mörgum finnst gott að vera í kulda, t.d.að vera úti á dekki og láta vindinn leika um sig.
  • Matarlykt fer illa í þá sem hætt er við sjóveiki og einnig pústið frá bátnum.

Þungun:

Þungaðar konur sem þjást af sjóveiki mega nota koffinátín í litlum skömmtum en best er að ráðfæra sig við lækni eða lyfjafræðing.
Þunguðum konum er ekki ráðlagt að nota engifer þar sem það er ekki staðfest hvort það geti haft skaðleg áhrif á fóstur.

Eyjafréttir
Keyrt af  GDPR Cookie Compliance
Friðhelgisyfirlýsing

Þessi vefsíða notar fótspor til að við getum veitt þér bestu notendaupplifun. Upplýsingar um fótspor eru geymdar í vafranum þínum og framkvæma aðgerðir eins og að þekkja þig þegar þú kemur aftur á vefsíðu okkar og hjálpa teymi okkar að skilja hvaða hluta vefsíðunnar þér finnst áhugaverðast og gagnlegast.