Laufey Welcome Center mun opna um Verslunarmannahelgina og taka á móti gestum við Þjóðveg 1 á horni Landeyjarhafnarafleggjarans. Reikna má með talsverðri umferð gesta til og frá Vestmannaeyjum þessa helgi og eru þeir sérstaklega velkomnir, sem og allir vegfarendur á Suðurlandi.
Laufey Bistró mun bjóða upp á úrvals matseðil fyrir svanga sælkera. Í Laufey eru hreinustu sjálfhreinsandi salerni í heimi frá Sanitronics í Hollandi, sjálfsafgreiðsluverslun með helstu drykkjum, snarli og vörum fyrir ferðalanga og einstök gagnvirk upplýsingaborð um áhugaverða staði og þjónustu í nærumhverfi. Allar upplýsingar um ferðir Herjólf verða áberandi. Kempower hraðhleðslustöðvar eru fyrir átta rafbíla, vöktuð bílastæði og ilmandi Costa kaffi. Laufey mun opna snemma, loka seint og stefnt er að opnun allan sólarhringinn fyrir hluta þjónustunnar sem er bylting í kjarnaþjónustu fyrir sveitarfélagið og vegfarendur á svæðinu.
Að baki Laufey stendur fjölbreyttur hópur ríflega 30 eigenda sem eru áhugafólk um bætta innviði, og þá sérstaklega hraðhleðslu fyrir stækkandi rafbílaflota landsmanna og vönduð hrein salerni við Þjóðveginn. Framkvæmdir hófust í ágúst 2022 og verður endanlegum frágangi lokið núna í ágúst tveimur árum seinna.
Laufey þakkar sýndan stuðning og áhuga Rangárþings Eystra, stofnanna á Suðurlandi, Arion Banka og þeim fjölmörgu samstarfsaðilum sem koma að þessu verkefni. Ekki síst þakkar Laufey íbúum nærsveita og í Vestmannaeyjum fyrir hvatningu og velvilja á þessari vegferð frá hugmynd að opnun, og segir Laufey því nú hátt og snjallt; Komdu fagnandi!
Bent er á vefsíðuna www.laufey.org og Facebook síðu Laufey.
Fréttatilkynning.
