Í viljayfirlýsingu HS Veitna hf. og Vestmannaeyjabæjar um úrlausn ágreinings um ýmis atriði er varða viðgerðir og endurnýjun á vatnslögn til Vestmannaeyjabæjar ásamt undirbúningi að mögulegir innlausn Vestmannaeyjabæjar á vatnsveitu í Vestmannaeyjum segir:

„Í ljósi þeirrar alvarlegu stöðu sem upp er komin varðandi vatnsveitu í Vestmannaeyjum hafa aðilar ákveðið að vinna sameiginlega að því að tryggja uppbyggingu nauðsynlegra innviða til að auka afhendingaröryggi vatns til framtíðar. Til að tryggja farsæla niðurstöðu ætla aðilar að leggja til hliðar ágreining um lagaleg atriði er lúta að núverandi framkvæmd og skyldum samkvæmt samningi um kaup vatnsveitunnar frá 2002 og um neðansjávarlögnina frá 2009.

Í því felst að HS Veitur munu, auk reglulegs reksturs á Vatnsveitu Vestmannaeyja, áfram leitast við að tryggja rekstur á núverandi neðansjávarlögn (NSL-3) og vinna að öryggi hennar í samræmi við leið eitt í minnisblaði innviðaráðuneytisins dags. 14. febrúar 2024.

Þá munu aðilar halda áfram að vinna að því að fá viðurkennda bótaskyldu útgerðar Hugins VE 55 og tryggingafélags þess vegna skemmda á neðansjávarlögn sem urðu þegar akkeri Hugins VE 55 fór í lögnina í innsiglingunni í Friðarhöfn. Þannig munu aðilar í sameiningu krefja útgerðina og tryggingafélag skipsins um skaðabætur sem nýttar verði til greiðslu kostnaðar við bráðaaðgerðir og viðgerða á núverandi lögn eða, eftir atvikum, til að leggja nýja vatnslögn.

Jafnframt hafa aðilar komið sér saman um eftirfarandi atriði:

1. Undirbúningur að kaupum á og lagningu nýrrar vatnslagnar milli lands og Eyja (NSL-4).

a) Aðilar hefja þegar formlegt samstarf um undirbúning varðandi kaup og lagningu á nýrri vatnslögn til Vestmannaeyja, svonefnda almannavarnalögn (NSL-4).

b) Aðilar tilnefna hvor sinn fulltrúa í undirbúningshóp vegna málsins, en verkfræðistofa verður fengin til að hafa umsjón með framangreindum undirbúningi fyrir hönd aðila og greiðist sá kostnaður sameiginlega af þeim. Undirbúningi telst lokið þegar tillaga að lausn liggur fyrir.

c) HS Veitur veita almenna ráðgjöf um framkvæmd verkefnisins, val á lausnum og innkaupaferli og eftirlit með framkvæmdinni. Þá annast HS Veitur samskipti við verksala í umboði Vestmannaeyjabæjar.

d) Gerður verður samningur við verkfræðistofu um einstaka þætti verkefnisins og horft til reynslu af framkvæmdum við NSL-3. Kostnaður við þessa þætti er hluti af heildarkostnaði við lagningu nýrrar lagnar skv. e) lið.

e) Vestmanneyjabær verður eigandi nýrrar lagnar og stendur straum af fjármögnun hennar og nýtir í því sambandi þær 800 m.kr. sem ríkisstjórnin hefur lagt til í stofnstyrk og tryggingabætur. Vestmannaeyjabær verður samningsaðili við þá verksala sem koma að framkvæmd verkefnisins.

f) Stefnt er að því að ný neðansjávarlögn (NSL-4) verði lögð á komandi sumri 2024 enda náist samningar við birgja og framkvæmdaaðila þar um.

g) Náist ekki að leggja nýja lögn (NSL-4) fyrr en sumarið 2025 skulu aðilar endurmeta stöðuna m.a. með hliðsjón af lið 2 í yfirlýsingu þessari.

2. Viðræður um mögulega innlausn Vestmannaeyjabæjar á Vatnsveitu Vestmannaeyja.

a) Aðilar hefja nú þegar undirbúningsviðræður vegna mögulegrar innlausnar Vestmannaeyjabæjar á Vatnsveitu Vestmannaeyja, sbr. ósk HS Veitna þar að lútandi.

b) Hvor aðili tilnefnir einn aðila í viðræðuhóp sem fær það verkefni að greina nánar forsendur innlausnarverðs m.t.t. ákvæða laga um vatnsveitur sveitarfélaga og þeirra samninga sem nú þegar liggja fyrir milli aðila.

c) Aðilar tryggja að viðræðuhópur hafi aðgang að öllum gögnum og upplýsingum sem nauðsynlegar eru til að vinna verkefnið.

d) Þegar viðræðuhópur hefur skilað frumgreiningu sinni taka aðilar afstöðu til formlegra viðræðna og setja nánari tímamörk um mögulega innlausn og fyrirkomulag. Viðræðuhópur skal skila niðurstöðu sinni eigi síðar en 15. júní næst komandi.“

Undir þetta kvitta Íris Róbertsdóttir f.h. Vestmannaeyjabæjar og Páll Erland f.h. HS Veitna hf.

https://eyjar.net/viljayfirlysing-um-urlausn-agreinings/