Endurbætur á dagdeild lyfjagjafar á Heilbrigðisstofnun Suðurlands í Vestmannaeyjum eru nú á lokametrunum. Það er Krabbavörn Vestmannaeyja sem hefur veg og vanda af lagfæringum á stofunni, sem verður öll hin glæsilegasta. Frábært framtak hjá félaginu. Framkvæmdir hófust fyrir jól. Búið er að kaupa inn stóla, sjónvörp og dælur auk annars húsbúnaðar fyrir sjúklinga og starfsfólk.

Verkið er unnið í samráði við stjórnendur HSU í Eyjum. Að sögn Gyðu Arnórsdóttur, deildarstjóra á sjúkra- og göngudeild HSU eru endurbæturnar að frumkvæði Krabbavarnar og engu til sparað.

„Vilji þeirra er að gera herbergið heimilislegt og þægilegt fyrir skjólstæðingana og gera starfsumhverfið betra fyrir starfsfólk. Þetta er svo sannarlega að heppnast vel og mikil ánægja með breytingarnar nú þegar. Starfsemi dagdeildarinnar er alltaf að aukast og hin ýmsu lyf blönduð og gefin fyrir stóran og mismunandi hóp skjólstæðinga sem nýtur og mun njóta þessara breytinga og þæginda. Fyrir hönd deildarinnar vil ég koma á framfæri innilegu þakklæti til Krabbavarnar í Vestmannaeyjum fyrir þessa höfðinglegu gjöf.” segir Gyða í samtali við Eyjar.net.

Myndir frá framkvæmdunum má sjá hér að neðan.