Neytendastofa hefur sektað sex rekstraraðila í Vestmannaeyjum en þeir eru Flamingó, Heimaey, N1 Friðarhöfn, Póley, Salka og Tvisturinn fyrir að fara ekki að fyrirmælum stofnunarinnar um verðmerkingar. Þetta kemur fram í tilkynningu á vef neytendastofu.
Í verðmerkingareftirliti er skoðað hvort söluvörur eru verðmerktar, hvar sem þær eru sýnilegar eða aðgengilegar neytendum. Einnig er skoðað hvort að verðskrá yfir framboðna þjónustu sé sýnileg. Í verðmerkingareftirliti Neytendastofu gerðu starfsmenn stofnunarinnar athugasemdir við verðmerkingar í verslununum þar sem ástand verðmerkinga var ábótavant og hvatti stofnunin til úrbóta. Þegar starfsmenn Neytendastofu komu í annað sinn voru enn gerðar athugasemdir við verðmerkingar og því hefur stofnunin nú sektað fyrirtækin.