Það var notaleg stund í á Bryggjunni í Safnahúsi á laugardaginn þegar Sigurgeir Jónsson og sonardóttir hans, Katrín Hersisdóttir kynntu bók sína, Fyrir afa. Smásögur Sigurgeirs og Katrín myndlýsir. Hún átti hugmyndina að bókinni og saman ná þau að skapa einstakt verk þar sem texti og myndir renna saman í eitt.

Sigurgeir las fyrstu sögu bókarinnar, Lakkrís og lausnargjald sem er sú sterkasta. „Tilurð fyrstu sögunnar er að ég var að labba niðri í bæ, rétt fyrir gos. Sá að utan við Apótekið var ungur nemandi minn úr Barnaskólanum. Ég stóð á bak við vegg og fylgdist með strákum sem voru að kaupa spritt fyrir pabba hans. Það fékk svo á mig að sjá þetta að úr varð smásaga. Hinar eru af ýmsum toga. Tvær svona hálfgerðar draugasögur,“ sagði Sigurgeir.

Bókin er lokaverkefni Katrínar við Kolding School of Design í Danmörku sem er þriggja ára nám. Í lokaverkefninu batt hún bókina í tveimur eintökum með forsíðu, gaf afa sínum annað og hin var sjálft lokaverkefnið. „Hann fór svo til útgefandans og bókin var sett upp í endanlegt form en ég var búin að leggja línurnar,“ sagði Katrín og bæði mega þau vera ánægð með útkomuna.

Jarl Sigurgeirsson og Ingibjörg Lovísa dóttir hans fluttu tvö lög.