Í dag var tilkynnt um stofnun nýs handboltafélags í Vestmannaeyjum, Handknattleiksbandalag Heimaeyjar (HBH). Í tilkynningu á facebook-síðu handknattleiksdeildar ÍBV segir að undanfarin ár hafi ÍBV handboltafélag haldið úti ungmennaliði.

„U-liðs leikmenn okkar hafa fram að þessu verið okkar framtíðarleikmenn. Verið landsliðsmenn yngri landsliða og verið að stefna á eða stíga sín fyrstu skref inn í meistaraflokk. Við erum með einn stærsta og besta 3. flokk landsins og út af þessum gríðarlega áhuga á handbolta í Eyjum höfum við ákveðið að stofna nýtt lið sem mun vera í samstarfi við ÍBV-íþróttafélag sem venslalið. Þetta er gert til þess að halda betur utan um peyjana okkar og tryggja þeim betri umgjörð en við höfum áður gert.

HBH mun vera í Grill-66 deildinni í vetur og etja þar kappi við lið í hærri styrkleikaflokki og þar af leiðandi undirbúa okkar leikmenn betur sem framtíðar leikmenn ÍBV. Um þessar mundir eru leikmenn HBH að selja árskort á leiki vetrarins og ef þið hafið áhuga endilega nælið ykkur í kort hjá þeim. Þið getið líka haft samband hér og fengið árskort á aðeins 8.000 kr. Þeir sem vilja styrkja verkefnið geta lagt inn á reikning 0582-14-003949 kt 540824-0290 eða haft samband við hjorvar@ibv.is.“ segir í tilkynningunni.