Það var notaleg stund og skemmtileg í Eldheimum í haust þegar þeir félagar, Guðni Einarsson og Ólafur Gränz kynntu bók sína, Óli Gränz, vegalega bók þar sem ævi Óla er rakin í stuttum sögum að hætti Eyjamanna. Skemmtilegur upptaktur áður en lestur hófst á ótrúlegri ævi Óla sem upp úr fermingu tók á sig byrðar heimilisins vegna veikinda foreldranna og varð fyrirvinna fjölskyldunnar fyrir tvítugt þegar faðir hans lést og síðar móðir þeirra.

„Óli Gränz er Eyjapeyi og grallari. Hann missti aleigu sína í Heimeyjargosinu, eignaðist sjö börn á átta árum með fjórum konum, en ástarlíf hans var stundum umtalað í Eyjum. Hjá honum hefur gleðin alltaf haft yfirhöndina en stundum hefur þó gefið á bátinn. Hér segir hann á hispurslausan hátt og skemmtilegan frá lífshlaupi sínu sem er engu öðru líkt,“ segir í bókarkynningu.

Orð að sönnu enda hefur Óli aldrei farið með veggjum og mætt lífinu með gleðina að vopni. Óli missti ungur foreldra sína en náði að vinna sig upp með ótrúlegri þrautseigju. Missti allt í gosinu 1973. Þegar hann og fjölskyldan voru komin þægilega fyrir vind í fjármálum lenti hann í klóm manna sem nýttu sér velvilja hans og hrekkleysi og hann nánast á brókinni einni klæða.

Enn náði hann vopnum sínum og nú var smiðurinn og alltmúgligmaðurinn Óli Gränz kominn í bókaútgáfu. Ekki bara á Íslandi heldur var allur heimurinn undir. Eyjapeyinn frá Jómsborg flaug með himinskautum í félagsskap æðstu manna heims. Kom sér alls staðar vel og meðfædd útgeislun hjálpaði til. Á kynningunni í Eldheimum var mættur sá Óli Gränz sem við höfum þekkt alla tíð. Hress, skemmtilegur og hroka ekki að finna í hans fari.

Þeim sem þetta ritar skolaði á land í Vestmanneyjum í lok áttunda áratugarins og hafði ekki lengi staldrað við þegar hann vissi hver Óli Gränz var. Strax við fyrstu kynni var eins og hann hefði þekkt manninn alla tíð. Óli og Guðni hafa skilað frábæru verki. Bókin mikill gripur, fallega sett upp og margar myndir með greinagóðum myndatextum sem gefa bókinni meira gildi. Ekki síst fyrir komandi kynslóðir.

Bókin ber með sér að Guðni og Óli þekkjast vel og Guðni hefur skilað frábæru verki. Stundum hefði verið gaman að vera fluga á vegg og hlusta á spjallið. Allt látið flakka þó ekki kæmist allt á prent. Stundum má satt kjurrt liggja en hlýja og væntumþykja eru meginstef bókarinnar og Óli sáttur þegar hann lítur til baka.

Saga Óla Gränz er skemmtileg upprifjun á lífinu í Eyjum fyrir okkur sem stigum fyrstu skrefin um miðja síðustu öld og gott veganesti inn í líf þeirra sem seinna komu. Falleg bók og skemmtileg og hlýjar um hjartarræturnar.

Ómar Garðarsson.