Fimm sérhæfð dagdvalarrými fyrir einstaklinga með heilabilunarsjúkdóm hafa verið opnuð í dagdvölinni og bætast við þau 10 almennu dagdvalarrými sem fyrir voru. Dagdvalarrými fyrir einstaklinga með heilabilunarsjúkdóm eru sérstök dagdvalarrými sem ætluð eru einstaklingum sem greinst hafa með heilabilunarsjúkdóm. Þjónustan miðar að því að rjúfa einangrun notenda, gefa þeim kost á að umgangast jafningja, taka þátt í daglegum athöfnum og þjálfa hug og hönd eins og geta hvers og eins býður. Sérhæfðu dagdvalarrýmin bjóða upp á allt sem almennu dagdvalarrýmin bjóða upp á, en þar að auki fá einstaklingarnir sem eru í sérhæfðu rýmunum aukalega vitsmunalega, líkamlega og félagslega þjálfun sem stjórnað er af iðjuþjálfa.

Til að uppfylla skilyrði fyrir þessi sérhæfðu dagdvalarrými hefur Vestmannaeyjabær gert samning við Guðrúnu Jóhönnu hjá Heimastyrk. Guðrún Jóhanna er iðjuþjálfi með norrænt meistaranám í öldrunarfræðum. Guðrún Jóhanna mun stýra endurhæfingarþjónustunni við notendur sérhæfðu dagdvalarrýmanna.

Þetta er búið að vera langt ferli og erum við mjög glöð að þetta sé orðið að veruleika.
Thelma Rós Tómasdóttir,
verkefnastjóri öldrunarþjónustu