Pattaralegur makríll stríðveiddur í „bæjarlæk“ Eyjanna
Makrílvinnsla í uppsjávarhúsi VSV. Myndin tekin á vertíðinni 2018.

„Við höfum landað um 3.000 tonnum af makríl til vinnslu í uppsjávarhúsi Vinnslustöðvarinnar frá því í byrjun júlí. Fiskurinn er stór, feitur og pattaralegur, einhvern veginn lengra genginn og þroskaðri en við höfum séð áður um svipað leyti sumars. Miðin eru rétt við Eyjar, við tökum þetta einfaldlega beint upp úr stóra bæjarlæknum okkar!“
Það er giska létt yfir Páli Guðmundssyni, framkvæmdastjóra Hugins ehf., útgerðarfélags Hugins VE, enda fer makrílvertíðin afar vel af stað. Slíkt gleður auðvitað alla sem að koma og hagsmuna eiga að gæta eftir öll vonbrigðin og samdráttinn sem loðnubresturinn skapaði í vetur.

Sindri Viðarsson, sviðsstjóri uppsjávarsviðs Vinnslustöðvarinnar, segir að fyrirtækið hafi tekið á móti um 6.000 tonnum af makríl til vinnslu á vertíðinni af þremur skipum: Huginn VE, Kap VE og Ísleifi VE.

„Við erum mjög ánægð með makrílvertíðina. Fiskurinn er fínn, meðalvigtin um 500 grömm, sem er í stærra lagi miðað við árstíma. Makríllinn er líka óvenjulega feitur sem skýrist af miklu lífi og æti í hafinu.  

 Mikill kostur er hve stutt er að fara til veiða. Skipin fara rétt suður fyrir Eyjar og hægt að kalla þau inn til löndunar með skömmum fyrirvara ef þörf krefur. Markaðsmálin líta líka vel út.“

Stefnt er að því að vinna makríl í Vinnslustöðinni fram á fimmtudag í næstu viku og hafa fyrri hluta föstudags upp á að hlaupa ef hreinsa þarf upp aflarestar.

Þangað og ekki lengra því þá blasir ekkert annað við Eyjamönnum en Herjólfsdalur og þjóðhátíð. Sú veisla stendur til mánudagskvöld að vanda en þá tekur alvara lífsins við að nýju. Sjómennirnir taka til við að rjúfa þjóðhátíðarfrið makrílsins á miðunum strax á þriðjudag, 6. ágúst.

Nýjustu fréttir

Stjórnmál
Spurt og svarað: Erlingur frá Eyjalistanum
Íþróttir
Sandra náði áfanga með íslenska landsliðinu
Sjávarútvegur
Með fullfermi eftir örstutta túra
Fréttir
Friðrik Dór mætir á Þjóðhátíð
Fréttaskýring
Vestmannaeyjar í gegnum linsu liðins tíma
Aðsent
40 ára aldursmunur á vinningshöfum
Aðsend grein
Hvert viljum við stefna?
Stjórnmál
Margrét Rós: „Ég er hvorki í fýlu né lít á mig sem tapara“
Mest lesið

Góð ráð fyrir siglingu

Sjóveiki

Hvað er sjóveiki?

Sjóveiki er misræmi milli skynfæra líkamans sem senda boð til heilans um hreyfingu – kyrrstöðu.

Þegar einstaklingur er úti á sjó þá nema skynjarar í vökvafylltum gangi í innra eyra hreyfingu og senda boð til heilans að einstaklingur sé á hreyfingu. Augun senda hins vegar boð til heilans um að viðkomandi sé kyrr. Heilinn á erfitt með að vinna úr þessum misvísandi og ósamræmdu upplýsingum og sendir skilaboð til magans um að tæma sig – þ.e. veldur uppköstum.

Einkenni sjóveiki eru þreyta, ógleði, svimi, svitakóf og uppköst.

Góð ráð til að hindra sjóveiki:

  • Góð hvíld daginn fyrir brottför. Að fara seint að sofa og snemma um borð í bát fer ekki vel saman ef fólk er hætt við sjóveiki.
  • Forðist áfenga drykki daginn fyrir brottför
  • Forðist djúpsteiktan, brasaðan eða saltan mat daginn fyrir siglingu.
  • Borðið góðan morgunverð. Borðið gjarnan hvítt brauð, hafragraut og ávexti þó ekki sítrus ávexti.
  • Forðist mikið koffein. Mikið kaffi er ekki það sem maganum líkar fyrir sjóferð.
  • Hafðu mat með þér á sjó. Gott er að hafa samlokur með kjúklingi eða kalkún. Kjötið er fitusnautt og brauðið er róandi í maga. Hafðu endilega eitthvað til að grípa í sem er létt í maga. Bananar eru mjög góðir til að narta í ef þú finnur fyrir ógleði en einnig er gott að hafa létt kex eða annað sem er ekki salt eða fitumikið.
  • Drekkið vel af vatni en einnig er gott er að drekka kóla drykki eða engiferöl í sjóferðinni

Lyf við sjóveiki þ.e. lyf sem slá á einkennin og fást án lyfseðils í apóteki.

  • Koffínátín – fæst án lyfseðils
  • Postafen – fæst án lyfseðils
  • Scopolamin plástur – lyfseðilsskyltEinnig má fá armbönd gegn ferðaveiki sem sumir telja að hjálpi.

Önnur ráð:

  • Engifer er jurt sem nýlega hefur fengið aukna athygli vegna þess að því er haldið fram að hún geti slegið á ógleði sem fylgir sjóveiki. Til forna tuggðu kínverskir sjómenn engiferrót til að draga úr sjóveiki. Flest lyf sem virka á ógleði verka á heilann en engifer virkar aðeins á magann. Ráðlagt er að taka 1000 mg. hylki hálftíma fyrir brottför. Einnig má taka eitt eða tvö 500 mg. hylki sem eru til viðbótar á ferðalaginu. Ekki er ráðlagt að drekka coke með engifertöflum.
  • Piparminta og te eru einnig gömul húsráð við ferðaveiki.
  • Sumum finnst betra að taka sýrujafnandi töflur, Alminox eða slíkt áður en þú heldur á sjó og þá er gott að hafa box með út á sjó.

Hvar í skipinu er best að vera o.fl.

  • Minna finnst fyrir hreyfingu og veltingi ef maður er staddur næst miðju bátsins.
  • Mörgum finnst gott að vera í kulda, t.d.að vera úti á dekki og láta vindinn leika um sig.
  • Matarlykt fer illa í þá sem hætt er við sjóveiki og einnig pústið frá bátnum.

Þungun:

Þungaðar konur sem þjást af sjóveiki mega nota koffinátín í litlum skömmtum en best er að ráðfæra sig við lækni eða lyfjafræðing.
Þunguðum konum er ekki ráðlagt að nota engifer þar sem það er ekki staðfest hvort það geti haft skaðleg áhrif á fóstur.

Eyjafréttir
Keyrt af  GDPR Cookie Compliance
Friðhelgisyfirlýsing

Þessi vefsíða notar fótspor til að við getum veitt þér bestu notendaupplifun. Upplýsingar um fótspor eru geymdar í vafranum þínum og framkvæma aðgerðir eins og að þekkja þig þegar þú kemur aftur á vefsíðu okkar og hjálpa teymi okkar að skilja hvaða hluta vefsíðunnar þér finnst áhugaverðast og gagnlegast.