Tveir rithöfundar buðu gestum á Bókasafninu upp á áhugaverðar bókakynningar sl. laugardag, þar sem bæði menningarsaga og nýskáldaðar frásagnir fengu að njóta sín.

Silfuröld revíunnar – ný bók Unu Margrétar Jónsdóttur

Una Margrét Jónsdóttir kynnti bókina Silfuröld revíunnar, þar sem hún rekur sögu íslensku revíunnar á tímabilinu 1957–2015. Í verkinu fjallar hún einnig um kabaretta, áramótaskaup og staka gamansöngva, auk þess sem hún dregur fram þá merku hefð sem skapast hefur í Vestmannaeyjum.

Þá sagði Una Margrét frá starfi Sigurgeirs Schevings á níunda áratug síðustu aldar og las upp úr verkum tengdum Eyjunum, sem vakti sérstaka athygli gestanna. Hún hefur helgað sig rannsóknum á revíusögunni í tæpan áratug og kom fyrri bók hennar, Gullöld revíunnar, út árið 2019.

Þórunn Rakel með nýja skáldsögu fyrir fullorðna

Þórunn Rakel Gylfadóttir, sem hlaut Íslensku bókmenntaverðlaunin í barna- og ungmennaflokki fyrir bókina Akam, ég og Annika, mætti nú með sína fyrstu skáldsögu fyrir fullorðna: Mzungu.

Titillinn, sem á uppruna sinn í Austur-Afríku og merkir sá eða sú sem ráfar stefnulaust um, hefur í dag einkum verið notaður um Vesturlandabúa. Í bókinni segir Þórunn Rakel áleitana og spennandi sögu um það hvert góður vilji og löngun til að bæta heiminn getur leitt.

Áhugaverð og lifandi dagskrá

Bækurnar vöktu verðskuldaða athygli, og þótti blaðamanni sérstaklega gaman að heyra Unu Margréti leiklesa revíur úr Vestmannaeyjum. Ljóst er að metnaður og áhugi Leikfélags Vestmannaeyja hefur djúpar rætur, og væri vel þess virði að efna oftar til slíkra viðburða þar sem saga og starf félagsins væri kynnt samtímanum.