Skákþing Vestmannaeyja 2026 lauk 19. febrúar þegar síðasta umferð mótsins fór fram í skákheimili Taflfélags Vestmannaeyja (TV) við Heiðarveg. Alls tóku 10 keppendur þátt og voru tefldar níu umferðir. Umhugsunartími var 60 mínútur á skák auk 30 sekúndna viðbótar á hvern leik. Teflandi skákstjóri var Sæmundur Einarsson.

Sigurjón Þorkelsson, núverandi skákmeistari Vestmannaeyja, og Auðunn Haraldsson, kennari, unnu báðir sínar skákir í lokaumferðinni og enduðu jafnir og efstir með átta vinninga hvor. Þeir munu því tefla þrjár atskákir (15 mínútur á skák auk 5 sekúndna á leik) og ræðst þá hvor þeirra hlýtur titilinn Skákmeistari Vestmannaeyja 2026.

Arnar Sigurmundsson varð í þriðja sæti með 6,5 vinninga. Í fjórða sæti varð Sæmundur Einarsson með 5,5 vinninga. Í 5.–6. sæti urðu Hallgrímur Steinsson og Arnar Bogi Andersen með 4,5 vinninga. Aðrir keppendur hlutu færri vinninga.

Næsta verkefni Taflfélags Vestmannaeyja er þátttaka í seinni hluta Íslandsmóts skákfélaga 2025–2026 sem fram fer í Reykjavík dagana 5.–8. mars nk. TV teflir fram átta manna sveit í sex liða úrvalsdeild og tveimur sex manna sveitum í 4. deild. Keppni í úrvalsdeild hefst 5. mars en 7. mars í öðrum deildum. Alls koma 25–30 keppendur frá félaginu við sögu, þar af þrír erlendir skákmeistarar. Aðrir eru félagsmenn TV, búsettir ýmist á fastalandinu eða í Vestmannaeyjum.

Skákkennsla fyrir ákveðnar bekkjadeildir í Grunnskóla Vestmannaeyja er nú í fullum gangi. Auðunn Haraldsson annast kennsluna þar og einnig þjálfun lengra kominna í skákheimili TV við Heiðarveg.

Hraðskákmeistaramót Vestmannaeyja 2026 fer fram í vikunni fyrir páska í skákheimili TV við Heiðarveg 9. Nánar verður greint frá mótinu þegar nær dregur, segir í frétt frá Taflfélagi Vestmannaeyja.