Eyjafréttir ræddu við nokkrar konur sjómanna í síðasta blaði og er Jónína Björk Hjörleifsdóttir (Jóný) ein þeirra.

Aldur? Þarf ég að segja hann? Júbb, fædd á því herrans ári 1966 og því 58 ára gömul.

Atvinna þín? Í dag vinn ég í Þekkingarsetrinu og skrifast ræstitæknir með meiru.

Fjölskylda? Ég er gift Bergi Guðnasyni og eigum við fullt af börnum og barnabörnum. Esther, gift Guðgeiri Jónssyni, andvana fæddur drengur, Ingvar Örn, Þórir og Inga Jóhanna, gift Sindra Ólafssyni og barnabörnin eru Bergur Óli, Katla Margrét, Þórhildur Helga og Ísabella. Svo má telja hund og hænur hér inn.

Hversu lengi hefur þú verið sjómannsfrú? Í um 40 ár. Má segja að ég hafi verið meira en minna sjómannsfrú þar sem ég reyndi að nappa Berg í land með fögrum loforðum, en það gekk ekki.

Á hvaða skipi er maki þinn? Bergur er nú á Breka sem er gerður út af Vinnslustöðinni.

Kynnist þið þegar maki er á sjó? Nei, við vorum nú bara að vinna á vélunum í Fiskiðjunni og leist mér svona helvíti vel á strákinn með appelsínugula hárið. Duglegur og hjálplegur eins og hann er ennþá.

Hefur maki þinn alla ykkar tíð verið á sjó? Nei ekki alveg, en kannski fyrir utan þegar við kynntumst fyrst og svo fékk hann verkstjórastöðu í Fiskiðjunni og ég reyndi að selja honum þá hugmynd að hún væri miklu betri en sjórinn. En það plan gekk ekki upp.

Hvernig hefur gengið að samræma sjómennsku og fjölskyldulíf? Það hefur gengið, ekki alltaf auðvelt og sérstaklega þegar börnin voru lítil og maður þurfti að stóla á sjálfan sig. Bergur hefur misst af ansi mörgum afmælum og allskonar viðburðum. Fyrstu árin var maður bara skítblankur en auðvitað lét maður hlutina ganga upp. Í dag fer hann bara í frí ef hann vill og getur fengið frí.

Helstu kostir sjómennskunnar? Þeir geta verið margir, Bergur hefur alla tíð elskað að vera á sjó en auðvitað hlakkar okkur til að geta farið að njóta. Í dag eru það góð frí. Okkur leiðist aldrei saman og náum að hvetja hvort annað til þess að hafa gaman af áhugamálunum sem er listin hjá mér og mótorhjól hjá honum. Svo elskum við að hafa fólkið okkar í kringum okkur. Barnabörnin hafa þar algjörlega vinninginn. Já og er ekki auðvelt að hafa smá neista í sjómannshjónaböndum?  Líklega sér fjarbúðin um það alltaf gott að fá þessar elskur heim.

Helstu gallar sjómennskunnar?  Ég þarf að elda. Bergur er ansi duglegur við það svo það hlýtur að vera stærsti gallinn. Jú og þetta að missa af ýmsu, en eins og ég sagði áður þá missa sjómennirnir af mörgu. Og við að hafa þá ekki með í svo margt.

Eruð þið með hefð um sjómannahelgina? Bergur er duglegur að fara á bryggjuna og njóta með öðrum sjómönnum. Stundum fylgi ég með. Það er alltaf farið í slysókaffið og á Stakkó. Reynum að missa ekki af að vera í góðra vina hópi og eiga skemmtilega helgi.

Eitthvað að lokum?  Sem betur fer er sjómannslífið að breytast frá því ég var ung. Tæknin bjargar miklu og þessi samskipti. Bátarnir eru ekki svo vikum skiptir á sjó og allt fjölskylduvænna. Já sjómennskan, já sjómennskan hún er ekkert grín eða hvað?