Í fyrsta skipti í 14 ár eða frá síðustu stjórnartíð vinstri manna, er taprekstur á sveitarsjóði Vestmannaeyjabæjar nú staðreynd og slakasta heildarrekstrarniðurstaða Vestmannaeyjabæjar síðan 2006. Slíkt vekur eðlilega áhyggjur og vonbrigði undirritaðra.

Útsvarstekjur langt yfir áætlunum
Útsvarstekjur síðasta árs eru 230 milljónum hærri en áætlanir gerðu ráð fyrir þrátt fyrir heimsfaraldur. Samt sem áður mistekst núverandi vinstri meirihluta að halda jafnvægi á rekstri Vestmannaeyjabæjar og skilar sveitarsjóði 60 milljónum í mínus. Heildarniðurstaðan versnar um 630 milljónir milli ára sem er áhyggjuefni.

Varnaðarorð hundsuð
Á yfirstandandi kjörtímabili hafa bæjarfulltrúar Sjálfstæðisflokksins margítrekað bókað á fundum bæjarstjórnar varnaðarorð vegna aukningu stöðugilda, fasteignakaupa, fjölgun bæjarfulltrúa eða annarrar óábyrgrar þenslu sem undirrituð hafa ekki getað samþykkt við aðstæður þar sem m.a. aflabrestur hefur verið yfirvofandi, mikil óvissa vegna heimsfaraldurs og yfirvofandi skerðingar fjárframlaga frá jöfnunarsjóði. Slík varnaðarorð hafa í nær alla staði verið hundsuð. Því ver og miður virðast áhyggjur undirritaðra vera að raungerast.

Hildur Sólveig Sigurðardóttir
Helga Kristín Kolbeins
Trausti Hjaltason