Bæjarráð Vestmannaeyja tók fyrir þær miklu tafir sem orðnar eru á framkvæmdum á svokallaðri Rauðagerðislóð á Boðaslóð, en ekkert hefur verið framkvæmt þar síðan lóðinni var úthlutað. Forsaga málsins er sú að bæjarráð samþykkti í byrjun mars árið 2022 að ganga til samninga við Steina og Olla ehf. um uppbyggingu á reitnum að undangegnu tilboðs- og hugmyndaferli.  Tvö tilboð bárust bæjaryfirvöldum.

Fram kemur í nýjustu fundargerð bæjarráðs að ráðið hafi óskað eftir upplýsingum frá umhverfis- og framkvæmdasviði vegna stöðu uppbyggingar á Boðaslóð 8-10, Rauðagerðislóð þar sem tímalína um skipulagsmál og framkvæmdir, sem fylgdi samningi um sölu lóðarinnar, hefur ekki staðist.

Samkvæmt tímalínu í samningi áttu steypuvinna og byggingarframkvæmdir á lóðinni að hefjast í byrjun þessa árs og hafa því orðið miklar tafir á uppbyggingu á byggingarreitnum. Endanleg tillaga að deiliskipulagi frá kaupanda liggur ekki enn fyrir.

Fram kemur í niðurstöðu ráðsins að bæjarráð telji tafirnar óásættanlegar enda hafi engar formlegar skýringar borist. Bæjarráð fól skipulagsfulltrúa og byggingarfulltrúa að kalla eftir skriflegri greinargerð frá kaupendum, eins og getið er til um í samningi, sem verður í framhaldi lögð fyrir umhverfis- og skipulagsráð.