Á síðasta fundi bæjarstjórnar Vestmannaeyja kom fram að lögfræðingar, sem fara með mál Vestmannaeyjabæjar er varðar kröfur ríkisins um þjóðlendur í Vestmannaeyjum hafi í sumar sent fjármálaráðherra bréf með ósk um afturköllun kröfulýsingar til óbyggðanefndar.

„Eins og rakið var í bréfinu telst krafan byggð á misskilningi um að Vestmannaeyjar hafi verið utan landnáms sem og ekki verið skýrum eignarrétti undirorpnar frá því land byggðist. Gert er ráð fyrir að fjármálaráðherra skili endurskoðaðri kröfulýsingu um miðjan september og hlutaðeigandi sveitarfélög vegna svæðis 12 hafi frest til 2. desember til að bregðast við,“ segir í fundargerð.

„Bæjarstjórn ítrekar fyrri afstöðu sína um að kröfugerð ríkisins í heild sinni gagnvart Vestmannaeyjabæ verði dregin til baka,“ segir í sameiginlegri yfirlýsingu bæjarstjórnar. Er vísað til bréfs til fjármálaráðherra frá 17. júní þar sem þess er krafist að ríkið dragi kröfurnar til bara.

Það því ljóst að sigur er ekki enn unninn í þessu fáránlega máli og mikils um vert að Vestmannaeyingar standi þétt saman gegn ríki sem allt vill gleypa.