Geisli hefur undanfarin ár boðið öllum sem heimsækja heimasíðu þeirra upp á beinar útsendingar frá Eyjum í gegnum vefmyndavélar.
Að sögn Þórarins Sigurðssonar, eiganda Geisla hafa þau verið að bæta við myndavélum upp á síðkastið. ,,Það er gaman frá því að segja að við vorum að setja upp nýja vél í samstarfi við Ísfélagið sem myndar þá innsiglinguna, Heimaklett og austari hluta hafnarinnar.”
Þá segir Þórarinn að ákveðið hafi verið að vera með ljóðlínur við hverja vél úr textum Ása í Bæ. ,,Eins og við þessa nýjustu, þar stendur: Á Klettsvíkina kom ég fyrr, og kannast þar við hverja hlein.”
Hann segir að enn eigi eftir að bætast við ein vél til viðbótar. “Undirskrift af þeirri vél verður “Ó, manstu út við Ægisdyr, er aftansólin fegurst skein” og segir það allt um það sjónarhorn sem vélin mun bjóða uppá” segir Þórarinn og bætir við að það sé ótrúlegt að fylgjast með heimsóknartölum á síðuna. ,,Það eru fleiri þúsund heimsóknir á sólarhring og mest þegar veður eru slæm” segir hann.
