Fjölmiðlakonan Edda Andrésdóttir sendir frá sér bókina Í öðru landi í næsta mánuði. Þar segir hún frá reynslu sinni af því þegar faðir hennar veiktist af afbrigði Alzheimers-sjúkdómsins og lést á innan við ári. „Ég held að ef fólk skrifar á annað borð, þá vinnur það svolítið úr sínum tilfinningum með því að skrifa. Þessi bók er skrifuð með hjartanu og tilfinningunum,” sagði Edda. Faðir hennar, Andrés Magnússon, verkstjóri í Hvalstöðinni í Hvalfirði til margra ára, átti einnig sinn þátt í því að bókin yrði að veruleika.

„Pabbi var myndlistarmaður og mikill bókamaður. Hann var svona leiðbeinandi minn í gegnum sitt mikla, góða bókasafn og eiginlega ábyrgur fyrir því að hafa leitt mig inn í þann heim. Við deildum alltaf þessum mikla bókaáhuga,” sagði Edda. „Hann hafði alltaf hvatt mig til að skrifa og stóð mjög að baki mér í því. Ég held að hann hafi nú kannski ekki átt von á því að hann yrði viðfangsefnið á endanum, en það varð nú,” sagði hún og hló við.

Faðir Eddu veiktist í mars í fyrra og lést í nóvember. „Bókin dregur nafn sitt af því hvernig hann eins og hvarf smátt og smátt inn í annað land, en líka af því að ég var sjálf eins og stödd í öðru landi á meðan ég fylgdist með honum. Um leið og ég skynjaði að tími hans var að fjara út varð mér hugsað til liðna tímans,” útskýrði Edda, sem í bókinni vefur saman reynslu þessa erfiða árs og minningabrotum frá liðinni tíð. „Bókin er eiginlega fjölskyldusaga, um venjulega fjölskyldu á seinni hluta síðustu aldar. En ég velti líka fyrir mér þessum skrýtna og óskiljanlega tíma og ellinni. Ég dreg til dæmis upp mynd af þeirri gömlu konu sem ég ætlaði að verða, áður en ég hugleiddi að maður gæti elst einhvern veginn öðru vísi en maður kýs sjálfur,” sagði hún.

Edda hefur áður skrifað viðtalsbækurnar Á Gljúfrasteini, við Auði Laxness, og Sólin kemur alltaf upp á ný, við séra Auði Eir. „Það var frábært að vinna með þeim báðum, en auðvitað er önnur og ólík reynsla að skrifa bók sem byggir alfarið á manns eigin reynslu og lífi,” sagði Edda. „Faðir minn hafði mikil áhrif á mig og líf mitt, og ég hafði þörf fyrir að skrifa þetta. Það hvatti mig líka að mamma sagði við mig á einum tímapunkti að það ætti að skrifa um þetta, því fólk veit ekki hvað gerist þegar svona hendir. Það hjálpaðist eiginlega allt að við að þessi bók varð til,” sagði Edda.

Í öðru landi kemur út í október. JPV gefur út.